港股噚日跌至50日平均線就即告反彈，睇嚟呢個水位都應該稍有支持嘞，不過Cookie即刻提醒阿虎唔好開心住，皆因中移動（941）、聯通（762）及滙豐（005）家陣已經成為對沖基金嘅工具，在一般情況下，大戶都會喺重要技術性關口位製造陷阱，即係話一定會質破11000關口製造恐慌，直至入市撈底嗰班散戶認輸為止。
近期做咗民企剋星嘅瑞銀華寶噚日為白馬（100）出咗份報告，叫客戶減持，因為現價太高。雖然白馬一向有高盛睇場，不過瑞銀嘅威力亦不容忽視，淨係睇吓歐亞農業（932）點樣俾佢摧殘就可見一斑啦。據聞瑞銀有唔少客持有不少民企，瑞銀叫沽，班客就會好聽話咁沽，所以白馬都有機會再次潛水。
兩大國內電訊股遭拋售之際，電盈（008）逆市上升，市場除傳佢發歐元可換股債券之外，重聽講話場外有唔少投資銀行為佢發高息票據，加埋有衍生工具發行商吸納此股作為發行備兌證之用，所以短期股價都會呈強勢，不過要挑戰3元水平則甚有難度。
文化傳信（343）證實獲得北京市軟件合約之後，股價都升咗唔小，噚日又再升24%，收0.485元。不過，文傳今次只賣出2000套軟件，有限錢而已，基本上唔值得升咁多。i師傅解釋話，微軟今次一份合約都攞唔到，反而文傳攞到，可能會再次惹起微軟入股文傳的憧憬。不過咁，微軟今次的失敗係因為北京以安全理由，若果微軟真係入股文傳，文傳可能連呢2000套軟件合約都無行，到時應該插至啱聽。