繼煲呔曾之後，梁錦松噚日帶咗第一批記者去佢嘅財政司官邸參觀，重做埋導遊，逐間房介紹。
阿松睇嚟好受美國人影響，間屋好有現代感，地板是深色嘅紫檀木，大廳作了些改動，做了個新走廊，重有一盆水，養有植物，又有唔少水晶擺設。
阿松最喜愛嘅當然係佢在二樓嘅AV房，裏面有家庭影院，大螢幕，五聲道喇叭，佢老哥重親自揀咗套以特技同千軍萬馬場面出名嘅《帝國驕雄》（Gladiator）播畀大家睇，只見啲戰士放箭真係好似飛來飛去咁，羅素高爾嘅電影當然高品味，八方問阿松秘書，阿松有幾多套呢？佢老兄話唔知，但唔會有三仔四仔。
阿松話畀班行家知，佢好少睇晒全套戲，多數只在房中聽音樂，因為可以一邊聽一邊睇文件。佢又話，入伙後冇覺有乜問題，因為以前都住過House，但係佢一講起狗仔隊，就仍然心有餘悸，唔知係咪上次葉靜子小姐單嘢陰影。
阿松亦幾風雅，掛咗唔少字畫，最特別嘅一幅係由上海書法家為他寫，只有兩個字「戇居」，係阿松於大學同學所贈，唔知係咪笑佢有錢唔搵加入政府咁笨；至於啲油畫，也是出自名家手筆。
阿松最頭痛嘅當然係點搞掂筆赤字，聽講佢已下定決心要喺一定時間內搞掂筆數，收支平衡，大家且看佢點表演了。
E-mail：