新年前後，喺中環街上，喺馬會會所，喺一兩間酒店，都碰到朋友同仔女。呢啲朋友或者係董特首口中之精英，有一個共同點，就係自己出身中下層，努力進入大學，憑一紙文憑，一帆風順，晉身富裕（唔係富貴）階級。呢班土生土長嘅朋友，與香港一起成長，可以講，佢哋對香港有貢獻，香港亦令佢哋豐衣足食，生活無憂。
呢班中生代精英有一個共同點，就係佢哋啲仔女都喺美國、小部分在英國讀書，雖然佢哋啲同期同學已成為大學教授中嘅骨幹分子。校長C位公子就讀於格蘭希爾間母校，本來讀開基因工程，覺得日日困在實驗室，實在太悶，改讀哲學與社會科學；大狀A位公子在森瑪斯校長間學校讀生物，發覺日日對住啲拉丁學名，了無興趣，改讀英國文學；賓架C位公子喺香港讀書好醒，入咗柏克萊讀電機方知天下之大，俾啲俄國仔嚇親。科技徐位千金係電腦奇才，成績好到極，但麻省理工啲畢業生非常嚮往ibanking，同學之間嘅相互壓力好大，於是科技徐嘅愛女亦心思思到華爾街做投資銀行家。
香港年輕人讀書，叻嘅齊齊讀理科，到咗外國讀書，先知理科未必合興趣，其他科目更過癮，又或者碰上吸引力十足嘅文科教授，甘心放棄理工科！做家長嘅都無謂太過堅持香港嘅功利觀點，同仔女拗頸咯。