美股前晚高開低收，港股冇藉口反彈，淡友得勢不饒人，恒指又再跌多184點，收11256。趙飛雲前日清倉避鋒頭似乎冇做錯，睇定啲再重組攻勢。
噚日提過嘅太平協和（438）走勢仍然硬淨，似乎唔太受恒指急跌影響。太協旗下嘅荃灣海天豪苑獲批出預售樓花同意紙，噚日開放示範單位畀傳媒參觀。海天豪苑批售，太協有資金回籠，可以投入大陸地產項目。
太協現時嘅賣點主要係上海100億元房地產發展項目，傳聞公司將會帶隊北上參觀地產業務，而近日股價走勢跑贏大市，值得留意，可趁大市回落，在0.62至0.66元水平收集，短炒跌穿0.60元止蝕。
趙飛雲前日碰到個老友，佢介紹隻大成生化（809），話短期會上試2.90元水平。近排民企當黑，跌完一隻又一隻，芬佬開始對呢類企業有啲戒心，屬高危分子，但大成噚日表現唔錯，好似有啲料到。不過，趙飛雲真係怕晒中資股啲突如其來消息，連中移動（941）都可以玩到咁盡，又何況其他公司呢！講起中移動，24元密集區有啲支持，不過暫時未到博反彈時候。