中原地產噚日喺將軍澳開分行，九龍區一姐劉瑛琳自然好開心。有見一手新盤係代理未來主要收入來源，為咗顯示旗下代理嘅新盤知識豐富，劉一姐更邀請記者突擊考核佢哋嘅同事，重話邊個記者check到佢哋有嘢唔識，中原就請食飯，更任得記者揀食乜㖭。
至於邊個找數，好似就話係個代理或者佢個上司，睇嚟中原同事要努力記住啲資料，唔係分分鐘做埋都唔夠請食飯。聽講恒基地產（012）都有用呢套手法考核啲代理。
發展商近期又再積極促銷貨尾，其中長實可算係表表者。點解咁講？皆因佢哋今日一口氣搞咗兩個記者會，地點重喺埋紅磡海逸豪園商場，時間分別係12點同2點45分，一個內容係開放荔枝角盈暉臺全新示範單位同銷售推廣，另一個就介紹紅磡海逸豪園5期25座現樓示範單位。
另外，仲量聯行透露，該行獲微軟公司選定做環球房地產代理項目管理及服務供應商（不包括微軟西雅圖總部），涉及樓面800萬方呎。仲量聯行會提供綜合客戶管理服務及為微軟協調全球房地產事務。
蘭西