兩隻電訊火種股中移動（941）同聯通（762），繼續拖低個市，恒指又唔見184點。3日下來，冇咗636點，差唔多嘞，可以搵個別對象博反彈。
和黃（013）收76.25元，跌1.25元，認沽輪1769彈升9%，好合理；接近平水，自然跟正股作反方向移動。但隻認購輪1765冇跌，收38仙，升1仙，則有啲意思，意味正股就快掉頭向上。1765下月夠鐘，溢價15.1%，槓桿率20.1倍，可以話冇吸引，不過正股向上郁三兩蚊，揸隻輪亦可搵米，可以快手快腳短炒三兩日，切忌坐盤坐得太耐，提防輸溢價。
3大石油股兩隻跌1隻冇郁，中海油（883）企定喺7.80元。吼住中海油認購輪，對象係1759，5月到期，現價12.8仙，溢價3.6%，槓桿率6.1倍，唔貴，等回到12仙邊上車。
昨日提嗰隻冠軍新輪1084，收2.6仙，升26%，龍虎榜排第2。
正股（092）喺9仙上下反覆成個禮拜，蓄勢向上，隨時破10仙。1084質新態勇，目標價3仙好快到。