出生於上海嘅黃宏發，上海雲吞幾乎係佢自小食到大嘅一種家常便飯，而全賴父母傳授，包雲吞對黃宏發嚟講絕對係EasyJob，黃宏發話每當心血來潮想食雲吞即會買料返去同老婆仔女一齊包，而每次閒閒哋都會食番三十隻。今日就請佢為大家包佢嘅家鄉雲吞，黃宏發首推上海風味嘅菜肉雲吞，要雲吞夠爽，黃宏發話至緊要加白菜，而白菜同肉嘅比例最好係2:1。
記者：陳冰麗 攝影：陳智良
加咗蝦肉及豬肉嘅雲吞係偏向無錫風味，當中無菜，但多咗蝦肉，食落依然有爽口嘅感覺，鍾意肉味較重嘅，呢款無錫風味蝦肉雲吞應該適合閣下心水。可煎可放湯，要香脆可將雲吞煎。
大蝦1斤
豬肉1斤半
雞蛋1隻
雲吞皮適量
1 大蝦剪去蝦頭，再去殼、挑腸、洗淨後，剪或切幼粒，加少許鹽、胡椒粉及薑碎調味，拌入蛋撈勻。
2 將蝦肉倒入豬肉碎內撈勻成餡料，取一片雲吞皮，包法如同菜肉雲吞。
3 燒熱鑊，加適量油，將蝦肉雲吞放入內煎之金黃香脆即可以。
1 大蝦肉因為本身已有膠質，所以用蛋毋須多。加少許胡椒粉及薑碎有助辟蝦腥味。
2 剪咗蝦頭可保留蘸粉炸或乾煎食。包時餡料唔好多，免煎時爆開。
好多時喺街外食到嘅菜肉雲吞餡料都會較散，但黃宏發自製嘅家鄉上海菜肉雲吞因為餡料用咗白菜，所以即使雲吞烚耐咗啲餡都重係實及爽，而雲吞餡之所以會散多數係用咗津菜之故，食落唔及用白菜爽口，要食其原汁原味，以清水烚之，再拌以豉油同食係最簡單方法。
白菜3斤
雞蛋2-3隻
雲吞皮適量
豬肉碎3斤(一半用作拌蝦肉)
豉油3湯匙
花雕酒、胡椒粉適量
糖1/2湯匙
鹽1湯匙
生油少許
白菜洗淨，汆水待其軟身。白菜切碎，切得愈碎愈方便包，切得唔碎可將其剁碎。用乾淨布包起切碎嘅白菜，然後榨乾水，待用。
豬肉剁碎或絞碎後，加入調味料拌勻。再加入雞蛋撈勻，並以順方向攪至肉起膠。將白菜拌勻豬肉內，加適量生油再拌勻即可做餡。
取一塊雲吞皮，放上適量白菜豬肉餡。對摺雲吞皮，掐實周邊皮，再喺左右兩邊搽上少許水。最後左右兩角對摺成元寶形。
煲滾適量水，放入雲吞烚至浮面即可以食得。
1 白菜汆水切碎及榨乾水至拌入豬肉內。自己剁碎豬肉，黏性較強，食落較爽，加少許花雕酒增加食味。
2 豬肉碎須加入雞蛋，待加入白菜有所黏性。