因周身掛金而得八両金之名的葉競生，在97金融風暴中散盡3,000萬家財，不但要賣樓賣車，連老婆也要離他而去。近50歲人才做帶子洪郎的他，想在影圈中討口飯卻被人唾棄，他頭頭碰着黑。不過他卻未言棄，現正跟舊日的商界老友努力開拓童裝事業。他感慨地說：「人哋明星闖出個名堂來搵錢，但我闖出個名堂後，結果錢搵唔到，又無嘢做。」
記者：曾順珍
攝影：關文慧
八両金Profile
原名：葉競生
年齡：四十多歲
籍貫：福建
來港年份：1978年
家庭狀況：已婚，有一6歲兒子
97年擁有資產：現金3,000萬，5層樓，3間舖頭，10斤金，3部車，多隻名表
02年擁有資產：月入約幾千蚊，1錢重金戒指2隻
曾是電影中經典丑角代表人物八両金，在經歷令其傾家蕩產的97金融風暴後，開始淡出娛圈，現時正努力發展童裝生意。
記者： 點解會搞童裝生意？
八両金： 可能自己做人爸爸，好清楚父母錫仔女嘅心態，買衫都會買有牌子嘅靚貨。我八両金在內地都很受歡迎，有一定市場，所以我打算自己設計衣服，用自己個名去發展一個名牌。幾個月前我已經開始探路，摸透後生仔嘅心理，佢哋多愛Yeah嘅款式，還要色彩鮮豔。我預算整個計劃會在農曆年過後，喺深圳、廣州等地推出。
記者： 你破咗產，點會有資金？
八両金： 我有一個舊日生意上嘅朋友，佢肯打本投資，重畀我25%股份，又為我喺佢公司中預留一個辦公室，佢重打算遲些會將個牌子引進美國唐人街。佢之所以肯幫我，都係因為我一向做人有義氣和有信用。以前我朋友遍天下，但當我有事時，朋友個個走晒，不過若你係有料之人，人哋一定會記得你。
風光時，八両金隨身戴的金飾足有四斤重。
記者： 點解轉做童裝生意，係咪無人搵你拍戲？
八両金： （開始有點激動）我話你知，娛樂圈嘅人比生意人還要現實。其實我有不停打電話到電影公司叫人搵我拍戲，三兩千蚊一日請我，相信電影公司都唔會死人，就當畀我捱一捱充飢，但點解連一日半日嘅工都唔畀我開呢？好似少林足球套戲，明明預咗我做，但最後都要飛起我，話我黑，驚我陀衰部戲。
以前我有錢時，好多時都會出錢請工作人員食飯，佢哋見到我都會斟杯茶畀我，但𠵱家？佢哋打電話嚟問我有無時間開工，當我Check完時間再回電時，佢哋就話已另找別人。
記者： 那麼有無一個圈中人你會比較感激？
八両金： （毋須思索便說）無喎！……如果真係要講，就只有狄龍，佢一直都有同我聯絡。我知好多人覺得佢老套，但佢做人有原則，每當有報紙報道我嘅負面消息，佢便會打電話來安慰我，鼓勵我要振作。
因為老婆鍾意，八両金便立即用幾百萬買下香港仔一高層單位。
記者： 為甚麼會將身家輸光？
八両金： 我是靠做生意起家的，78年我由福建來港，身無分文，白天靠做地盤維生，晚上就睡在一間大廈嘅天台。不過我好勤力，放工後會兼職做保安同托石油氣罐，所以喺頭一年我就賺到萬幾兩萬蚊做生意，即等於現在十幾萬。後來生意愈做愈大，97年係我資產高峯期，那時我有3間舖頭、5層樓和3架車。
97年，有人叫我開孖展戶口，我連孖展係乜都未知，總之我矇查查就攞咗600萬出開咗個戶口。年尾時股票突然大跌，於是我又攞300萬出來補倉，後來我連樓都要拿去做按揭籌錢。但點知樓價狂跌只得3成，於是掉轉頭我要倒欠銀行樓宇差價。99年，我可以話係徹底無晒所有資產，連老婆都走埋。
我有想過自殺㗎，想到20年積聚嘅所有身家無晒，老婆又走佬，年紀又大，真係翻唔到身。但想想吓突然想起個仔嘅笑聲，心諗如果跳落去，就真係乜都無，於是我先至打消要死嘅念頭。
胞姊葉沁濃覺得八両金好有諗頭，惟獨性格太直，易得罪人。
記者： 身家輸光時，你怎樣生活？
八両金： 我做樓宇按揭時欠下財務公司幾十萬，佢哋就派人上門恐嚇，於是我惟有帶住個仔走佬，連屋企都唔敢返。那時我求過電影公司畀工我開，但都無人「騷」我，我試過連續十個月都無工開，惟有靠商界朋友和胞姊接濟。就算現在，我每個月都只得一日半日戲，就連半日到內地登台，我都會去，最少都有幾千蚊幫補吓。
記者： 你搵過乜嘢工？
八両金： 曾經有個有錢老細，想請個司機兼保鑣，每月人工有萬六蚊，連加時補水有兩萬，足夠我同個仔生活，我諗自己重打得，於是就第一時間應徵。起初在電話裏都講得好好，叫我立即去見工，點知當佢見到我時，佢話自己為人低調，唔想見報，而我又街知巷聞，所以唔會請我，最後他封咗2,000蚊利是畀我，但我無要，你估我係乞兒咩！
我又想過去做清潔，我八両金係草根出身怕乜嘢，就算叫我赤手去洗廁所通坑渠都無所謂，但記者會唔會百分百唔騷擾我先？我唔想傳到去個仔間學校，佢返學時一定會被其他同學笑死，我要顧全個仔嘅感受。
八両金把太太的相片從相簿中全部抽起，因為每次見到她，便會勾起掛念之情。
記者： 你太太為乜離開你？
八両金： 金融風暴後，大家成日嗌交，佢想買件靚衫都無，想出外飲杯嘢又唔得。97前她喜歡乜嘢我都可以買俾佢，但金融風暴後，我乜嘢都無晒，襯現在佢重後生，唔走佬等幾時？如果到咗三、四十歲時，佢想走都無咁易。
佢走咗咁耐，從無打電話問吓個仔點樣，我奇怪點解呢個世界有咁嘅人，可以連些少掛念孩子之情都無。
（八両金一提起太太便皺起眉，頭耷耷眼濕濕的模樣）
可以在北角租到屋住，已是萬二分慶幸。
記者： 呢間屋係你租來住嗎？
八両金： 算係啦，呢間屋有千幾呎，共有五間房，住咗我和親戚共十幾人，因為根本無業主肯租俾我，佢哋一見到我就唔肯簽約，重話：『報紙寫你咁樣喎，你有無能力租樓㗎？』加上會有記者上門搵我，佢哋會嫌煩，唔肯租樓畀我。又或者明明講好租金一萬，一見到我就會立即起租至萬八，根本要令我租唔到。如是者起碼有十幾二十個業主推過我。最後都係要由我一位親戚出面簽約，然後我就跟佢哋一齊住，我每月都有份交租㗎。
記者： 對將來你有乜嘢計劃？
八両金： 如果我搵到錢，我一定唔會再做娛圈，如果做嘅話我會轉向幕後，例如度橋拍戲，咪當生意咁做囉，我做生意從未蝕過本，我相信我一定搞得到。
（看來八両金對這個令他又愛又恨的娛圈還是有點戀戀不捨。）
黃生是八両金的童裝生意夥伴，他認識八両金是因為有個親戚從事電影行業。
「我覺得我和八両金好啱傾，他很有生意頭腦，而且大家對做生意的睇法好接近。我本身做童裝生意都有二十多年，最近好想打開國內市場，所以希望八両金可以協助我們推廣。另外在美國我也有朋友做電影行業，可以的話我都好想幫八両金到美國發展。」
對於八両金的評語，黃生是：「我睇好佢㗎！佢好有鬥志，性格好強，只要找到一個啱嘅項目，我相信佢一定可以在短時間內翻身。」