又有創業板新股上市，今次係證券業合作社控股（8123），小初見上次經紀陳睇得咁準，即刻又走去問點睇，點知佢話唔知喎。
經紀陳話今次合作社搵人幫手圍飛搞咗好耐，最終係搵咗大凌集團（211）幕後原班人馬幫手，先至搞得掂。照計佢哋近排連續多隻創業板股都做得有聲有色，遠啲嘅山河控股（8127）唔在講，近的彩虹國際（8079）、國際融資（8004），同埋最新的活力世界（8100），統統在第一日都表現出眾。
經紀陳話今次唔同，合作社今次每股0.38元，配售2.5308億股新股，集資額高達9617萬元，唔係之前的細細隻，重有喎，話就話有人包底，但因為隻股由經紀組成，好多行家唔多唔少都要幫手，兼且要貨完全唔困難，加上隻股話就話做網上交易引擎，但實際上集資金額大部分要嚟做孖展融資，即係放數咁解，你話上咗之後點搵人跟先？所以佢表示擔心其實好易理解喎。