「雲在天空水在瓶」，「鏡花水月覓真情」。前者是心境，後者是對讀者的期望。
近日與老友甲消夜、老友乙午飯、老友丙下午茶，對話如下：老友甲話：「陳生，我間保險公司想搵你演講，酬勞不錯，講講吓就有第二間，咁就唔需要賣書維生。」我微笑答：「我不是演講的材料，這些錢，賺不來，想過放低賣書的生涯，但又捨不得放低，因為感到賣書安心，賣書開心，個心叫我要留低。」老友乙話：「陳興濤，你又話自己拿得起，放得低，睇咗你幾日專欄，怨氣甚重，其實你的同學個個都關心你，尊重你，你有無醒覺呢？」我答：「潘Sir，我希望你將這種感覺，傳達予每一位欠債過重的苦難人，告訴他們，他們的朋友都是關心佢哋，尊重佢哋，對朋友要有體諒，不要過分敏感！」（行文主旨已達）
星期三老友丙話：「阿濤！你又接受《壹週刊》訪問！點解咁儍啫！若連犯兩次同一錯誤，我怕你受不來。」我以平常心地說：「我接受這次訪問，不是因為《壹週刊》，而是因為陳惜姿，若文章矯情，總會失光采，我深信陳惜姿，佢會珍惜羽毛，何況，就算錯，都是兩次不同的錯誤。至於自尊自信，這刻都懶理，因為有更重要的事情要做，就是——
陳慶嘉先生（舊同學）、徐詠璇小姐（舊師姐）、林振強先生（暑期工時的師傅），求求你哋，在專欄中講多幾句，救救負資產！林行止先生、曹仁超先生、張五常先生、李怡先生、岑逸飛先生、鍾偉民先生、張徹先生、陶傑先生、洪清田先生、張立先生、劉健威先生——小弟是你們的長期讀者，常常偷師學藝，請容許我求求師傅們，請再出多一句聲，救救負資產！因為，負資產有得救，負資產應該救！
按（1）：賣魚「陸」、賣菜「吳」，收到電郵，好想和你們通電話，我自己冇電腦，但又冇你哋號碼；寄賣英文書那位小姐，有些錢想畀番你，但又失去聯絡。按（2）郭炳江先生，若有任何媒介轉述的得罪處，並不是我的原意，在此講聲對唔住！若有機會，我願意為教會做點事贖罪（雖然我不是教友）。
電郵：
每日連載刊出