彭羚（Cass）昨日往港台，接受《娛樂滿天星》節目訪問，Cass透露本月二十五及二十六日於紅館舉行一連兩日的個唱，邀請了黃耀明及黃貫中任嘉賓。
Cass表示今次是多年來她首次與黃貫中（Paul）合作，她笑說：「其實，今次搵阿Paul係因為我為個唱揀歌時，想唱Beyond啲歌，後來諗吓不如搵埋阿Paul唱歌啦，後尾打電話畀佢，佢好好人，重一口應承。以前我哋見到面，都只係點吓頭，早排喺錄音室都係第一次見面咋。」
此外，Cass將於本月十八日推出《給我唱過的男孩們》大碟，Cass表示碟中十一首歌曲都是翻唱男歌手的歌曲，問Cass為何不揀老公林海峰的歌唱，她笑說：「我喺屋企日日都唱佢啲歌㗎，唔揀佢啲歌唱係因為佢票數唔夠高囉。」