張柏芝早前為仁濟表演飛車受傷，中國星聲稱要追討賠償。但新一期《壹週刊》卻指無綫為柏芝所購的二千萬保險要死亡才有得賠，加上柏芝表演時的安全措施疑不足，保險公司可能不會作任何賠償。
張柏芝於上周五晚在將軍澳，為無綫《慈善星輝仁濟夜》表演飛車，豈料發生意外，弄傷了胸椎骨，估計需卧牀三個月始能康復。柏芝經理人公司中國星連日來已表示要向無綫追究到底，以彌補柏芝三個月不能工作的千萬元損失。
不過據新一期《壹週刊》報道，指無綫為柏芝飛車所購買二千萬保額的保險，只限於死亡才可得到賠償。至於受傷、甚至因意外導致身體癱瘓，只能獲賠償醫藥費，其他賠償欠奉，加上保險條款有附帶條件，指表演者若表演時安全措施不足或有任何隱瞞，將不會獲任何賠償。
而張柏芝當晚表演所穿的飛車衣着裝備，有指並不合乎安全規格，故此保險公司正在調查中，有可能不對柏芝作出任何賠償，看來中國星分分鐘要向無綫追討疏忽責任賠償，才有着落。
無綫製作部助理總監何麗全，昨日隨無綫「2002年度國際華裔小姐競選」大隊到番禺拍攝外景，對於《壹週刊》指柏芝飛車受傷，將不獲保險公司賠償一事，何麗全說：「對方冇可能收到我哋份保單，資料唔啱，賠就一定有得賠，但賠幾多就答唔到，份保險包括醫療同意外，當然重有其他條款。買咗幾大保險銀碼係商業秘密，唔講得。」
何麗全又表示剛才跟柏芝方面聯絡，他說：「佢嘅情況唔係咁壞，進展OK，段報道都唔成立，我聽日（即今日）會同柏芝經理人方面聯絡，了解柏芝嘅傷勢。」是否一定賠足？何麗全說：「好難答到，𠵱家要了解柏芝傷勢。」
此外，柏芝父親鬍鬚勇昨日則氣憤地說：「根本由頭到尾都冇講過保險問題，做慈善事唔係為保險，我同柏芝睇到嗰段報道都好嬲啲人咁講。佢已經好咗好多，冇咁痛，亦都唔使食止痛藥。」
採訪：陳月媚
攝影：黃文偉、馬啟然