唔知喺咪班芬佬放假放到遲鈍晒，中國要發多兩個新電訊牌照其實周二已經通晒天，但結果班芬佬要等到周三至嚟沽貨，等阿虎重以為周二跌幅咁細係反映市底強勁㖭，令阿虎跌碎眼鏡，真係無癮。
黑客話畀阿虎知，噚日大戶質低中移動（941）與中國聯通（762）嘅同時，唔少資金轉馬買入銀行與地產股，個市至可以企喺11440收市，跌幅收窄至272點，大市資金仍然充裕。另外，班芬佬點會唔知中國最終都會有4個移動電話牌照，今次擺明係借勢沽中移動壓低大市，實行震倉兼收貨。
中移動噚日挫7.8%，已經引起管理層關注，聽講佢哋又準備拯救行動，當然唔會少得公布啲好消息，例如某某外資電訊公司合作嘅好消息，否則又點捱到配股收購8省市網絡嗰一刻呢？相信中移動再稍為調整，就會反彈。其實美林噚日已開始入市接貨，話唔定今日就已經可以企穩。
恒光實業（663）近期有啲異動。i師傅話隻股嘅重組計劃已傾到七七八八，可能有啲春江鴨搶先行動，噚日再升16%，收報0.072元。不過，公司因負債而進行重組，好多時新買家除咗會要求債權人削債外，亦會要求股本重組，將現有股東股權有咁薄攤咁薄，所以現價追入有冇着數，實在好難講。
建聯（385）先舊後新發行5.5億新股予大股東，大股東會沽出3.9億股舊股，但據聞呢批舊股重未有人要，有心人或者要將股價進一步炒高散貨。不過噚日隻股升16%，收報0.036元，以成交額1868萬元計，成批舊股可能已經散晒出街。