日本京都有古都之稱，匯集了日本文化千多年歷史，呢度的美食重係以傳統方法製，食落另有一番風味。𠵱家唔使搭飛機到日本京都先食到，因為由今日起至1月14日，喺崇光九樓就舉辦咗一個京都祭，將京都地道小食搬晒嚟，係12號當日重有日本新年傳統節目之一，舂年糕表演，未見過的你千奇咪錯過，連傳統舞伎、太鼓及柔道都會喺不同時段表演，邊睇表現邊食小食夠晒正！
記者：葉少萍 攝影：楊錦文
鳴謝：香港柔道館(25914570)
想自己製作日本年糕一樣有辦法，可以用細啲嘅年糕舂製作，亦可用呢個日本人專用嚟製磨末調味料容器代替，約$70-$80個，崇光或city'super有售，但只可製1-2人分量，製法與大的年糕一樣，糯米洗淨加適量水分蒸熟，放進容器內，用木棍將之鋤爛，邊鋤邊加水製成原味年糕。
傳統秘方製「千枚漬」
呢款大安品牌「千枚漬」是京都泡菜，以京都聖護院地方特產蔬菜，及北海道頂級昆布，配以大安傳統秘方醃製而成，入口蔬菜夠爽甜，味道有少少酸，作前菜就最適合。有小茄子、酸瓜、雜菜等。
鮮味十足特色魚糕
雖然京都離海邊遠，但仍然有魚製產品可享用，好似京都魚的糕咁，就是採用特別秘方製，能保持魚鮮味，而數當中款式多兼味道好，「茨木屋」出品的魚糕可說是其中之一，魚糕入口又鮮又甜，咬落煙煙韌韌好得意，就咁食或拌湯、麵食一樣得。
京都咖啡代表Inoda
呢款由「InodaCoffee」出的Inoda咖啡喺京都好出名，佢以自創混合的咖啡豆及炮製法聞名，用五十多年的煎焙咖啡經驗炮製各款咖啡，如阿拉伯風味及德國風味等等，一點也不失咖啡原有風味，愛好咖啡的你，記住千祈唔好錯過呢度的咖啡。現場重設有咖啡室，可即時歎番杯，一律$35杯。
除咗有許多京都小食賣之外，重有京都一些傳統藝術表演，如舞伎、太鼓及柔道等等，兼有傳統手工藝品賣，𠵱家想感受京都文化，嚟呢度都可以啦！
舉辦地點：
地址：銅鑼灣崇光百貨九樓
日期：即日至1月14日
時間：10:00am-10:00pm
查詢：28338338
表演日期及時間：
日本舞伎1月10日 1:30pm、2:30pm、4:30pm及6:30pm
日本插花1月10日 3:30pm及5:30pm
兒童太鼓1月12日 3:00pm
兒童柔道1月12日 3:30pm
舂年糕係日本人新年最重視的傳統節目之一，每年新年差不多每戶日本人必做的活動之一，以分工合作形式進行，一人負責舂蒸熟了的糯米，另一人負責加水及猜勻糯米糰，使糯米未變糊狀時不會變乾，舂至全部糯米變糊狀即成年糕，這款活動除了加強一家人合作精神外，重有祈求新一年滿福到臨的意思。
雖然要喺1月12日先睇到現場情況，而且只得一場，現特別先請當天有分參與的岩見龍馬先生及河內勇一先生先為大家預先示範，想睇現場記得準時到啦！
表演時間：1月12日4:00PM
*所有製成的年糕都會分給在場人士免費試食，不過數量有限，想試食就要睇準時間啦！
琴箏形甜糕點
呢款好似琴箏的甜糕點稱為聖，出自聖護院八橋總本店，係去京都時必買手信之一！由一層薄皮包住紅豆茸製成，外皮軟腍，重好香紅豆味，最適合鍾意食甜點人士。更係即場即整即賣㖭（$5件）。
外形可愛花之宵
呢款花之宵的甜糕點，出自「高野屋貞 」，為了要表達京都四季之不同，採用了四季轉變時的果子，如栗子、桃、紅豆等，更製成不同形狀，如桃、櫻花、鯉魚等，外形可愛，入口更軟腍香甜。
夷川五色豆夠爽脆
呢款由「豆政」出的夷川五色豆，特別揀選京都特產，兼最大粒的豌豆去乾炒製成。外層有藍、紅、黃、白、淺啡等五種顏色，入口粒粒夠爽又夠脆，味道甜甜哋都幾特別。