一月六日吳靄儀專欄談《權貴賞識的校長》，內容其實係講學術研究，後來引伸到乜嘢人應該做校長。吳靄儀引述丘成桐云：「在香港做學術研究，要爭取經費，就要先獲得當權者的賞識，他認為花時間與當權者打交道是浪費了研究學問的光陰。」
丘成桐並唔係如吳靄儀所講，句句中的。中嘅係「與當權者打交道浪費研究光陰」，唔中嘅係前一句。香港嘅大學學者要申請研究經費，唔需要與當權者打交道！
邊個係當權者：特首、政務司司長、財神爺、教統局局長、立法會議員？政府撥款畀大學做研究，無論每年撥三億、四億或者五億元，都要經尊貴的立法會議員OK，之後將筆錢交畀大學教育資助委員會屬下嘅「研究資助委員會」（ResearchGrantsCouncil）去分配，RGC主席就係中大副校長楊綱凱教授，成員有海外著名理工科人文科學者同本地教授，例如吳靄儀熟識嘅金耀基、劉紹銘、李歐芃，你話呢啲人係唔係「權貴」呢？
RGC每年收齊各大學嘅研究計劃申請書，委託本地及海外嘅各學科行家評審，按一定標準派錢。當然，因有budgetconstraints，並唔係人人有份，永不落空，但搵勻全世界都係咁上下嘅辦法嘅啦。
喺美國申請政府研究經費，唔通一寫張紙就有錢攞咩？香港啲所謂權貴，其實唔會干涉RGC點樣分配研究經費，吳大律師學識淵博，地位崇高，可以去問清楚。