大戶轉軚開淡倉，中移動慘被祭旗。大戶鍾意同散戶對賭，大眾睇好時佢造淡，但近兩日咁樣急煞車調頭，其實有啲夾硬。
中移動（941）噚日慘被洗倉，大跌7.8%，雖然趙飛雲守紀律，喺股價跌穿27元時即刻沽貨，結果都要沽到26.80元至沽得出。午市睇見港股無起色，都係避一避鋒頭，尾市實行大清倉，揸現金為上，稍後重新再部署。有老友點醒趙飛雲，話近兩日港股下跌可能同備兌證發行有關，因為大戶要買貨，但𠵱家水位咁高所以要先行震倉。
趙飛雲決定清貨離場，主要係原先寄望炒上嘅中移動自身難保兼拖累大市，而地產股及銀行股升幅已大，加上亦有隱憂，冇晒火車頭恒指點樣升？當然，恒指唔升唔代表其他股票唔升，其他有概念及有動作嘅股票一樣可以玩。近幾日太平協和（438）走勢認真硬淨，聽講稍後公司會請傳媒及證券界北上參觀地產業務，可以留意吓。