本地時裝盛事「香港時裝節秋冬系列2002」將在下周二於灣仔會展揭幕，四天內共有八場時裝表演。今年負責大會髮型顧問的「O4」名不經傳，但來頭不小。本報率先訪問其股東之一的Pius，解構時裝節精粹及2002髮型潮流。
由本地Orient4、LaChoima及台灣Eros4合併而成的髮型店O4，將為下周二（十五日）開幕的「香港時裝節秋冬系列2002」，任髮型顧問及styling。O4早前先為大會刊物內的專輯創作髮型，其中一輯以舊區為背景的晚裝照，由名模Rosemary、楊崢及Eunise等展示晚裝髮型的新突破。
O4股東之一、名模楊崢的緋聞男友Pius，昨日在訪問中指出，希望在作品帶出晚裝髮型「街頭化」的概念，Pius說：「其實晚裝髮型已經唔興好隆重、好grand嘅，呢幾年easy咗啲，反而走返向街頭，走streetfashion嗰種帶啲punk味、有型、新潮破格嘅感覺，而且好重視立體感。」
Rosemary的露肩晚裝配一頭辮仔頭就是好例子，他說：「大熱嘅辮仔頭正正係來自街頭，運用假辮仔、hairpins，做出啲凌亂感，同營造有層次嘅立體感。」
而日常的髮型方面，Pius謂「長、直、碎」髮型已經流行太久，今年開始，有層次感的曲髮將成大熱。
Pius更透露當中竅門說：「長度可以好隨意，如果頭細、面形細，或者髮質屬於幼細、軟身、好淺色嗰種，可以做得密啲，誇張少少，其他一般嚟講，中長度，髮尾做少少波浪形已經好靚。」
Pius剛為梁詠琪（GiGi）演唱會出任髮型師，他表示GiGi在舞台下不需誇張的髮型，他說：「GiGi本身好乾淨樣，好清爽，簡單嘅中短髮型，氣質已經可以好突出。」
擁有不少紅星客戶的本地髮型屋Orient4，一月開始與李連杰和唐季禮的御用髮廊LaChoima，以及台灣的Eros4合併，改名為「O4」，更投資百萬重新裝飾中環及銅鑼灣的髮型屋。
Pius說：「我哋試行好似律師行用合夥人嘅方式，吸納多啲有實力嘅合夥人，強化自己，而且Orient4好多藝人客，LaChoima就banker同行政人員客多，合併之後可以取長補短。」
（部分相片由香港貿易發展局提供）