「又冇咗兩份長Part-time啦！」甫坐下已經一臉愁容的林季珍，當了家務助理5年，收入一直不穩定。不過她沒有放棄自己，離婚後帶着幼女一直努力搵工，自言72行之中除咗警察，真係行行都做過。是的，對比6年前危坐於窗邊打算一躍而下的絕望、惶恐於丈夫虐打的傷痛、帶着幼女離家出走的掙扎，今天的林季珍，每一天都活得那麼積極，最自豪是三個仔女至今都沒有學壞。「每一朝無病無痛可以去做自己喜歡的事，每一日都係最圓滿的一日」，訪問完結前，曾是柴灣明愛單親小組主席林季珍對記者說。
記者：陳文慧
攝影：周旭文、林栢鈞
鳴謝：明愛單親家庭互助中心（電話：28876617）
「婚後頭十年都好開心㗎，年年都會去旅行周圍玩。」不過丈夫的大男人性格，讓林過着封閉的生活。不可以在外面工作，沒有和朋友聯絡，每天被四面牆圍着自己，只可以在家中看電視。「如果老公心情唔好，全家都冇電視睇，唔鍾意就月中至畀家用我。」
工作不如意，丈夫開始無故虐打林季珍。「有時瞓瞓吓覺，無啦啦俾人叫醒就打一餐，十幾年來都唔知發生咩事，自己只識坐喺牀邊喊。仔女成日俾佢喺街邊打，大女都係俾佢打到離家出走。」
有一晚同丈夫大吵一場後，再與二子鬧交。獨自坐在廳中的林季珍，想着這個月又沒有家用了，學費家中支出一大堆都不知如何是好，小時候家窮現在又要捱，自己生存為了甚麼？細女長得那麼可愛，一定有好多人可以照顧佢。胡思亂想之中，腦中一片空白，就這樣推開窗簾，半個人已經坐出窗外。「那一刻只想到不如跳下去算了！」幸好及時被兒子發現，拉回沙發上，哭到死去活來。
細女由兩歲開始，每天看着父親的暴力成長，到了六、七歲仍然經常發噩夢及瀨尿；二子行為偏差、愈學愈壞；大女已經離家出走，面對三個子女的情緒問題，林季珍不斷問自己，是不是要離開這個男人，細路仔才會回復正常？在那段看不到前景的日子，大女一句肯定的說話：「如果你覺得留喺佢身邊有危險，就應該要走。」林終於帶着當時七歲的細女，離開這個曾經疼愛的男人。
一個失婚女人帶着女兒找地方住相當困難，1996年林手上只有5000元，幾經辛苦找了一間細小的梗房，單是租金已經要2300元，手上的錢已經所餘無幾。由於害怕在街上撞到丈夫，林每天都與女兒關在房中聽收音機，只靠綜援度日。住了兩個半月，為了安全，林寧願以5000元租下一個300呎獨立單位，並自食其力找工作，綜援只拿了數月便沒有再拿。捱了四年貴租，林季珍自言除了警察，差不多每一行都做過了。「走咗出來起碼我唔使睇佢面口，我有手有腳一定可以企番起身。不過屋租已經佔咗大部分支出，如果政府可以畀個公屋單位，我根本唔需要攞綜援！」
以往長期生活在惶恐中，出走後需要求助於心理醫生，細女亦要接受心理輔導。幸好身邊的朋友不斷鼓勵與支持，她開始到佛教組織慈濟當義工，心情差時便閱讀一些佛教與心理書籍，學習插花。「我會睇勵志的小說，要motivate(鼓勵)自己，我𠵱家成日都教姊妹睇多啲書，唔識的字可以抄低問人。因為唔可以成日記住過咗去啲嘢！」
記者問她將來有甚麼計劃？「我對將來冇計劃㗎，聽日啲嘢轉得太快，不如努力做好今日。我無放棄過自己，我鍾意學嘢、做義工，每一日可以健健康康咁去做我鍾意做嘅嘢，已經好開心。」帶上紫色招牌眼鏡，經常笑容滿面的林季珍如是說。
約林季珍訪問不容易，當家務助理與義工服務已經忙得不得了，還要上電腦課及不定時的臨時工。第一次約好了見面，一日前收到林的電話，有臨時工要做了，改天吧。訪問中途，又會有姊妹致電過來傾訴心事。在東區醫院拍攝當日，她一邊帶小組活動還要點名帶路，只能擠出五分鐘時間拍照，像要用盡每一分每一秒似的。
訪問第一日，林季珍便告訴記者剛剛失去了兩份長期兼職。原來自金融風暴後，當了五年家務助理的林季珍工作一直不穩定。現時只剩下一份每月只有約1,000元收入的寫字樓清潔兼職，及每月約有2,000元的兼職家務助理，即使暫時收入微薄，林季珍卻堅拒攞綜援。其實她隨時隨地都不會放過任何搵工機會，行街看街招，上單親中心看報紙等，可惜年紀往往是搵工的最大障礙。「寧願請一個無經驗的30歲，也不要一個有經驗的40歲好似我咁。」
林曾於柴灣明愛單親家庭小組「自強一族」當了一年半主席，現在則是炮台山明愛單親家庭互助中心的義工，自96年開始於東區醫院兒科及骨科當義工，亦為佛教慈濟基金會的資深義工五年。並經常報讀不同的課程，像兒童心理、精神科、插花、中醫推拿，剛上完了水電裝修的課程，現在正學習中文電腦。
不斷學習除了增加工作機會之外，對於她，也是自強的動力「我好鍾意學嘢，如果我唔增值，細路會睇唔起我，雖然自己年紀大了，但係我唔會畀自己衰老。」正是這種積極的毅力，離婚後的林季珍一直沒有放棄自己和她的三個子女。
明愛單親家庭互助中心的中心主任龐家祺，認識林季珍於去年五月，她主動報名參加親子EQ工作坊開始。
「我最欣賞佢嘅主動，並唔係坐喺屋企等件事過去，而係自己去搵幫助，而且成日都為人服務，做好多義務工作。」不過龐亦指出，林季珍放太多時間在服務別人身上，其實亦都應該要錫吓自己，對自己好一點。
對於林表示，單親媽媽需要一間公屋多於一份綜援，龐家祺稱，冇人想要綜援，不過如果子女年齡太細，唔方便出外工作，的確有申請綜援的需要，以維持基本的生活開支。她亦承認，單親家庭的住屋問題嚴重，單親媽媽帶着子女租房的困難最大，如果政府加強居住問題的援助，有助單親家庭改善生活。