經紀陳噚日真係身體力行，全力投入兩隻創業板新股英普達（8077）同埋Jessica（8137），結果當然係賺到笑。英普達收1.41元，較招股價0.79元勁升78.5%；而Jessica重厲害，收0.48元，較招股價0.25元升92%。
小初收市打電話畀經紀陳，佢已經諗住動身出去慶功。經紀陳話已經同Jessica吻別，但同英普達重藕斷絲連，因為今日唔排除會炒多一陣。
另外，佢重話噚日停牌批股嘅建滔化工（148），據講好受歡迎，所以今日復牌可能唔使跌。
建滔今次配售6000萬股新股，每股作價5.35元，較停牌前收市價5.70元，只係折讓6.14%，重有唔好忘記隻股停牌前勁升一輪，所以配售價認真唔平，咁都話唔夠分，唔通真係有售後服務？
經紀陳話係喎，配售代理里昂稍後重會為建滔做路演，繼續推介，所以佢都出盡法寶，要咗多少。