大戶掃清盈富基金（2800）後，大市反而下挫178點，收報11713點，成交72億元。不過港股之前在毫無利好消息情況下仍連升3日，累積升幅逾500點，都應該唞一唞。噚日差不多利淡消息盡出（包括國內會多發兩個流動電話牌照、美資大行調低滙豐（005）評級及日圓日股急挫），但大市都跌唔夠200點，市底相當強勁。不過最強都係地產股，恒地（012）勁升3.2%，新地升1.1%。
證監會已讓步唔使備兌證發行商董事負民責，相信發行商好快就會有行動，在市場吸納藍籌，準備大量發輪，相信港股中短期會升勢持續。
德智（070）噚日公布獲中方拍檔委任為中國境外及香港嘅文化娛樂事業獨家代理，重話唔使投資都可以每年收逾千萬元佣金，雖然單Deal對德智有利，但股價卻有好消息出貨現象，急跌16.3%，收報0.118元。
黑客話今次可能只係震倉，而非散貨，幕後短期內可能捲土重來，因為聽聞德智稍後重有唔少動作跟尾。
易達興業（855）噚日勁升31%，收9.3仙，成交高達1170萬元，幾有氣勢。不過要留意係此股去年10月以每股0.10元配售1.8億股，集資1800萬元，之後股價插至6仙水平先至再炒上嚟，家陣該批股份仍屬蟹貨，所以一旦踢上0.10元以上就要小心嘞。Cookie話此股純粹齋炒，唔會有特別驚喜。