美股現回吐，淡友大反攻。前晚杜指跌62點，收10197，未能守喺250日線（10204）之上收市，好友差幾點都唔托住，有啲示人以弱咁款。亞洲股市亦普遍下跌，港股跌178點，收11713，成交縮至72億元，不過跌市成交縮總好過升市成交縮。
趙飛雲買嗰隻中移動（941）撞正地雷，信息產業部確認未來兩年會增發多兩個流動電訊牌照。其實趙飛雲早前已聽過呢個消息，所以周一推介中移動時，講明要撇開中長線基本因素及只係買嚟短炒，但估唔到真係撞得咁正。不過暫時都唔使沽住，睇埋大行嘅反應都未遲，噚日跌市成交縮，等佢確認跌穿50日線27元先考慮計數。
證監不再要求備兌證發行商委任董事負民事責任，睇嚟新輪出籠嘅日期可以提早，藍籌股後市可以睇好，呢個亦係唔太心急沽中移動嘅理由之一。
中石化（386）噚日守唔住50日線（現處1.12元）收市，如果今日抽唔番上去，可以先計數。不過1.07元支持力相當強，估計係反覆向上局面，唔想走出走入亦問題唔大。