2001年已成歷史，又係時候揭曉過去一年最賣得嘅家用遊戲名單。日本權威雜誌《Oricon》最新一期公布咗2001年最賣得家用遊戲軟件銷售數字，當中SONY同任天堂各有一半支援軟件打入頭名位置，不過PS2嘅《FFX》則以2,230,470全年總銷量，榮登榜首位置。喺日本受歡迎，始終唔代表香港玩家一樣受落。今日就搵嚟一班資深Game迷，睇吓佢哋對呢8大暢銷Game有乜睇法。
記者、攝影：徐影龍
ImageGirl：Mandy（Imagine）
鳴謝：DreamStore
自從《FF7》在次世代機種PS登陸後，SQUARE已很久未有令機迷拍案叫絕之作，就算以王菲唱主題曲之《FF8》及號稱回歸原點嘅《FF9》，都得唔到機迷嘅口碑，更令人感到SQUARE只懂花錢製作漂亮之CG動畫。幸好來到更強機能嘅PS2，《FFX》不但可保持出色畫面質素，而且由故事、人設、世界觀到系統，都明顯花過心思設計，令機迷再次樂於沉迷《FF》嘅世界，榮登榜首算實至名歸。
機種：PS2
類型：RPG
開發商：SQUARE
玩家意見：鬼皮（機齡17年）
「《FFX》令我重燃對SQUARE嘅信心，遊戲內我最欣賞係可隨時換入唔同角色戰鬥，增加運用戰略嘅思考，兼且可同時提升眾人之經驗值，實在係一項偉大嘅設定。」
KONAMI另一主力搵錢系列，遊戲以收集各式各樣怪獸卡為主，可透過戰鬥或交換作收集途徑，當中會出現極罕有嘅特別卡，小朋友埋頭苦幹都係為咗儲齊全套卡，加上三個限定版本同期推出，捉正玩家儲一套嘅心理，銷量想唔高都幾難。
機種：GB
類型：TBL
開發商：KONAMI
玩家意見：世傑（機齡12年）
「我由漫畫開始鍾意《遊戲王》嘅，玩過Gameboy版本後一發不可收拾，每次獲得特別卡都會好開心，令我更有衝動儲埋其他卡。」
當年《GT》震驚遊戲界，令人知道SONY都有能力編寫出色遊戲軟件。續篇《GT3A-Spec》發揮PS2機能極限，豐富多邊形及高解像貼圖，令畫面表現像真度更高，玩家更能感受到真實賽車嘅刺激感。
機種：PS2
類型：RAC
開發商：SCEI
玩家意見：阿森（機齡14年）
「我本身係做汽車零件買賣，對車算略有認識，玩過《GT3》後覺得像真度極高，玩落好有賽車Feel，重周時約埋班朋友一齊研究點樣將部勁車調校到最好。」
N64表現不濟，幸好Gameboy嘅《PoketMonsters》（港譯：寵物小精靈）銷量驕人，保住任天堂嘅地盤。之前嘅金同銀版銷量毋庸置疑，來到2001年推出嘅Crystal水晶版同樣創出佳績。基本上遊戲玩法同卡通片一樣，以手上精靈球之寵物打倒對手為己任，當然唔少得各式各樣嘅突發事件。
機種：GB
類型：RPG
開發商：任天堂
《DragonQuest》（港譯：勇者鬥惡龍）可算係國寶級RPG，其變種玩法版本嘅《DQMonster》雖然同樣為RPG類型，不過目的變咗搜集及培育怪物為主，最後在大會中取得勝利。當中分男、女主角兩個唔同版本，女主角版本則排行第23位，銷量只得369,830套。
機種：GB
類型：RPG
開發商：ENIX
Capcom唯一打入十大之作，雖然遊戲側重動作要素，相對解謎成分偏低及簡單，不過其豐富連續技、反擊技等設計，令玩家樂於花時間鑽研，金城武參演明智左馬介一角及配音亦應記一功。
機種：PS2
類型：ACT
開發商：Capcom
又一款續集首度登陸PS2，遊戲畫面大幅強化，能充分表現環境中嘅氣流、水、砂石等變化同影響，令遊戲玩法更接近真實，加上日本人熱衷打Golf，難怪《我們的Golf3》能登十大位置。
機種：PS2
類型：SPT
開發商：SCEI
N64居然有Game可打入十大，證明呢隻《MarioParty3》魅力非凡。遊戲玩法以集動作、迷你Game、大富翁於一身，一切但求熱熱鬧鬧，一班人開Party玩至啱。
機種：N64
類型：TBL
開發商：任天堂