加入環保元素係近年發展商起樓嘅大趨勢，為市場提供唔少商機，好多管理公司重喺旗下屋苑大搞環保，實行為住戶慳錢。新地（016）屬下嘅啟勝同康業兩家物業管理公司，就喺旗下80個屋苑推行「中央回收管理系統」，分類收回廢紙、膠樽同鋁罐循環再造，推行咗1年，回收廢物5500公噸，重賺咗超過63萬，平均每個屋苑有差唔多8000蚊分，起碼對日常開支有啲幫補。
美聯物業改變往年周年聚餐嘅習慣，改為各區自己搞番，其中香港同新界區就揀咗今晚舉行周年晚宴，前者開50席，後者70席。聽講新界區有超過20隻金馬做抽獎禮物，都幾吸引。總行亦會喺今日舉行頒獎禮，其中超過百人攞到長期服務獎，做滿10年嘅重可以攞到個「金飯碗」，得獎者包括陳坤興、執行董事張錦成同營業董事羅國安。
蘭西