陳奕迅（Eason)、容祖兒（Joey）及Swing前晚到澳門做騷，Eason唱得狂野，愈唱愈興奮。在不停流汗下，索性將身上的衣物脫掉，最後只剩白色背心及貼身運動褲，使其全身線條畢現。而Joey則因聲沙要咪嘴唱歌，但亦不慎甩嘴收場。
陳奕迅（Eason）、容祖兒（Joey）及Swing前晚到澳門綜藝館演出「CTM型格出色演唱會」，而英皇十三歲新人Isabella亦有往睇騷。眾歌星除獨唱首本名曲外，亦分別進行合唱，而Eason都表演得異常興奮，落力演出之餘，身上的衣服亦愈除愈少。
起初Eason穿着外套及運動褲出場，唱至汗流浹背，他便索性把外套除掉，剩下短袖T恤，及後他落台後又再上台演出時，Eason只穿上一件白色背心，當他與Joey合唱《放過你》時，Eason又唱又跳，興奮若狂，不知是否跳得全身濕透的關係，只見Eason的運動褲緊貼身軀，下半身線條盡現。
另外，組合Swing的Eric及Jerald前晚甚懂搶鏡，當Eason與他們合唱時，二人故意開玩笑追打Eason，到Joey與Swing合唱之際，二人又作狀為Joey伴舞，又與Joey在台上咬耳仔，十分親熱。
Joey前晚演出失準，幾首歌都要夾口形，但卻不慎甩嘴，Joey說：「我聲沙呀，又要跳舞，所以先咪嘴，師傅羅文介紹我睇氣功師傅，我希望快啲醫番好，把聲係我搵食工具嘛。」
提到柏芝受傷，Joey謂她會往醫院探望，Eason則說：「我唔需要喺報紙關心佢。」
採訪、攝影：陳儀敏