PocketPC的硬件配備一向強勁，用來打機就更加無得頂，所以各大遊戲開發商都用盡PocketPC的機能，開發出聲音畫面俱佳的精采遊戲。不過PocketPC遊戲多不勝數，為免大家浪費金錢，今日精選6款極品遊戲介紹畀大家。不過大家掛住打機之餘，記得要幫部機差足電，免得玩玩吓無電咁吊癮啦！
記者：劉耀祥 攝影：楊錦文
網球大滿貫
這款PocketPC的精采網球Game－－TennisAddict，絕對可以考驗你的技術，只要用支Stylus，就可以高冚低抽，隨時隨地都可以挑戰世界第一。攞唔攞到大滿貫要睇你的實力，不過最方便就係以後唔使約埋朋友先可以開局！
售價：US$29.95(約HK$234)
查詢網址：
免費連珠
這款PocketPop可謂俄羅斯方塊演變出來的遊戲，玩法非常簡單，只要將兩粒以上同色的圓珠整走就可以，不過要成功就要下一番苦功。最後一提就係呢個遊戲係免費嘅，絕對好玩又抵玩！
售價：免費
查詢網址：
飆車一族
相信每個第一次見到這個賽車遊戲的人，都會「嘩」聲四起，皆因RacingDays的畫面非常細緻及流暢，而且十分着重遊戲的耐玩性。玩家可以選擇賽車車種及賽道，而每部賽車的齒輪箱、制動、輪胎均可自行調校，絕對係每個PocketPC車迷必備軟件！
售價：US$19.95(約HK$156)
查詢網址：
田徑七項
PocketAthlete內置七個運動項目，包括考你速度的短跑、跳遠、跨欄，重有訓練你眼界同埋反應的擲鐵球、射箭、飛碟射擊、標槍。而且每次都會記錄低你的成績，各位玩家努力打破世界紀錄啦！
售價：US$19.95(約HK$156)
查詢網址：
釣友必備
PocketBassPro提供多款3D環境畀你玩釣魚，魚的款式亦多達十多種，總有一款適合你。若果自問技術了得，遊戲內亦設有挑戰賽，玩家可以考驗吓自己的實力，捧番隻杯返屋企。
售價：US$19.95(約HK$156)
查詢網址：
模擬城市
在電腦上已經推出多個版本的模擬城市SimCity，繼Palm版本之後再推出PocketPC版，整個遊戲論畫面及操控性均與PC版相同。作為市長嘅你，除咗要修橋補路起樓之外，學識點樣慳啲使就更加緊要，喺銀根短缺嘅情況之下，努力去建造你心目中偉大的城市。
售價：US$29.95(約HK$234)
查詢網址：