大顧問幾個月前邀約左丁山一齊到珠江三角洲一遊，介紹我認識當地啲省市領導人及民企豪富。大顧問話：「你咁耐冇返鄉下，跟我返去睇吓啦，包你耳目一新。」
左丁山日日開工，冇辦法抽出時間跟大顧問做兩晚三日遊，只得無限期擱置。
大顧問就來往頻繁，去東莞多過我去旺角。呢晚飯局上又碰到佢，請佢update吓，大顧問話：「你就快變成鄉下佬，就好似香港啲高官咁。我上次返廣州，見到啲高層，佢哋齊聲話香港啲高官冇大用，唔識內地發展迅速，重以為自己好叻㖭。廣州會用二十五億人民幣搞城市規劃，香港領導問有乜可以幫吓手，廣東領導瞪大雙眼話：冇噃，唔使咯。人哋發展得快過我哋，你真係快啲返去睇真啲。」
左丁山細細聲問：「唔少人關注黨幹部喺企業扮演嘅角色，會唔會窒住晒，政治掛帥噃？」大顧問大笑：「真係蹺，上次我帶一位二十年未返鄉下嘅富翁返東莞，佢又係問呢個問題。前面嘅禮貌答案就係唔會，請放心；背後自己人坐埋就恥笑港燦，佢哋話喎，香港人追唔上形勢，問一啲二十年前嘅問題，唔識嘢。」
大顧問指出，共產黨已經了解企業係黨與國家嘅沉重負擔，唔賺錢唔得，所以江澤民提出突破性建議，就係確定私有制企業，容許資本家?企業家入黨。大顧問又話，江澤民呢個觀點會名留青史喎。