港股成交持續上升，i師傅話美資已經開始入市增持港股。睇個勢又真係似模似樣，否則冇理由年初成交就有成90幾億銀。Cookie來料話，上周五淡友突然全面平倉，好似後市會有啲事會發生，個市可能升破12000點亦未必可以停低。恒指噚日收11892，升190點，成交93.38億元。
黑客話，國企股與地產股可能會突圍而出，因為中國政府為咗要挺董，將會出盡法寶搞好香港經濟，就算醫唔好香港嘅內傷，至少都要搽靚塊面，其中最好嘅辦法就係畀資金流入香港炒股票炒樓，粉飾太平，唔好畀阿董連任得太肉酸，所以樓市可能會繼續銷情理想，國企股亦繼續炒上。不過有啲紅籌股就要小心，例如駿威投資（203）呢類汽車股，因為國內汽車業已開始對中國入世作出部署，實行減價競爭，以面對進口車嘅威脅。
明珠興業（988）與新萬泰（433）近日話中國萬安集團會繼續收購明珠興業股權。不過，i師傅話呢單嘢可能傾唔成，大家咪太樂觀，慎防有人借消息出貨。明珠噚日股價下挫4.4%，收報4.4仙。
軟庫發展（648）噚日配售8000萬股，最多可加碼至1億股，每股0.30元，其中6000萬股係新股，2000萬股為舊股，可超額配售2000萬股舊股。其實今次軟庫配股只係上次配售計劃嘅延續，上次軟庫總共配售1億股新股，每股作價亦係0.30元。上次配售後，股價一直企於0.30元以上水平，唔知今次完成配售後，重有冇人會繼續托價呢？