恒指又再上升190點，銀行股郁得最少。滙豐（005）以95元埋單，只微升25仙，全日高低位亦只係1.25元。
呢1.25元嘅波幅，對滙豐幾乎唔係嘢，但認購輪1704炒家，則係富貴同浮雲之別。
1704早段最低價14.6仙，中段最高價26仙，埋單18仙。最醒嘅人最低價入貨，最高價離場，獲利78%；最冇運嘅人摸頂入貨，收市落車，則輸31%。炒即市嘅，有人大魚大肉，有人要食粥。因為上落快，炒出炒入大有人在，總成交1億份，比較發行量8千萬份更多，成交金額第1不在話下。
點樣炒呢隻輪，冇乜人可以有100%把握。總之，正股喺兩個幾禮拜之內，升唔上98元（𠵱家95元），隻輪就1個仙都唔值。
地產股標青，可能反映地產市道有轉機。醒目嘅人，見有地產輪可炒，走去搞隻美聯公司輪589，隻輪收22.5仙，升25%。
589明年到期，現價22.5仙，溢價2.1%，槓桿率3.2倍，數據算唔錯，小注怡情，想買賣快趣則取正股（1200）。