麵麵有感情

麵麵有感情

食,要有口感外,還講感情,除對食物外,老闆與食客的關係不少得!可能你正奇怪小記何以這麼感性,只不過是今次採訪香港仔舊大街數間麵店後,得到的總結。數間不同特色的麵店,客人對這裏都有深厚感情,味道固然是留客之道,老闆的親切、關懷態度,都是這條昔日大街到現在還人頭湧湧的原因!
記者:梁佩芬
攝影:關文慧

山窿魚蛋麵50年秘方長賣長有
50年前,香港仔舊大街旁的一個山窿內,有位謝先生做魚蛋麵,魚蛋鮮味可口又彈牙,做到街知巷聞;35年前,從山窿搬到地面舖,貫徹始終,依然用新鮮魚做魚蛋,再加入鹽水等攪勻,令魚蛋爽口、結實又有彈性。現在謝老先生已80多歲,店舖由兒媳打理,但味道依舊無改變,令麵舖一年四季、由朝到晚都人潮如鯽,山窿檔做到有限公司,當真少見。

30年老顧客莊太
食咗三十多年,同謝家親切熟絡,就算搬離香港仔,都成日返嚟食番碗魚蛋麵;今日帶位加拿大返港老朋友嚟撐枱腳。

魚蛋麵$16一碗(細)
小記一向食魚蛋麵都會加胡椒粉,因要避魚腥味,今次無添加,魚蛋果真有魚味又唔腥,加上湯底好味,想不到區區五粒魚蛋加兩塊魚片,就是50年生意的靈魂!

1吋厚金黃炸魚片$68一斤
謝記另一個賣點就是整條金黃色的炸魚片,食客除order魚蛋麵,大多會再要多條炸魚片,切片品嘗,香脆夠魚鮮味!

店名:山窿謝記魚蛋有限公司 
地址:香港仔舊大街80-82號地下
電話:25523809
營業時間:10:00am-6:00pm

香港仔唯一拉麵店周二買一送一
日式拉麵以北海道最正宗,因為當地特別寒冷,最正是食碗暖笠笠的拉麵;夏季翳悶潮濕,濕濕哋易入口,所以北海道人最叻做拉麵。這些故事,小記都是從拉麵店老闆Anthony處得知,估不到投身飲食業短短四年,就深明這道理,所有拉麵都由北海道運來,當然他亦少不免到當地考察,領略神髓,先做得似模似樣!

招牌拉麵雜錦天婦羅拉麵$42
無味精、正宗日式豬骨湯底,逢星期二晚上六至十時,全店拉麵買一送一,二十蚊就有咁大碗地道北海道拉麵,咁抵邊度搵!







店名:味吉陽一日式拉麵
地址:香港仔舊大街118-120號兆羣大廈6號舖地下
電話:25559949
營業時間:11:30am-10:00pm

台南擔仔麵攪勻食有風味
縱橫飲食業二十八年的鍾先生,做勻中西意法日越菜,大約三年前到台南高級食府「台南擔仔麵」偷師,學會如何炮製風行全台的擔仔麵,後改良迎合港人口味,將原先無味的湯底做成豬骨雞肉湯,絕不含味精。

老闆鍾先生
香港仔多水上人,佢哋對食要求好高,係指味道、口感同服務態度,價錢反而唔重要,開舖頭一年最難捱,要不斷轉食物,迎合當地人口味;做落後,發現佢哋係一批好重舊情嘅人,講真有近八成都係熟客仔。

食客葉先生住上水
第一次嚟食,都唔知食乜好,但老闆夥計好有心機慢慢介紹招牌美食,態度非常好。

台南擔仔麵$16
台灣人做麵唔講究湯底,加上擔仔麵又無味,豬肉碎就成為最有味道食物,有些微蒜茸味,所以食前一定要攪勻肉碎,令湯同麵都加添肉味,更加可口。擔仔麵是台南獨特麵種,入口有點似日本拉麵,不黐牙但帶點煙韌。

鹿港魯肉 $28(下)
蒲理香菇牛筋$28(上)
鹿港同蒲理都位於台南,分別是出產魯肉(即五花腩)及香菇主要市場,魯肉半肥瘦,在一片瘦身浪潮下,依然是最多人order的小食;香菇就打正健康美食口號,加上爽滑牛筋,最正係撈飯食。









店名:台南擔仔麵
地址:香港仔舊大街58-62號協勝大廈地下A及B舖
電話:25183596
營業時間:11:00am-11:00pm

小菜上海麵舊客最愛
晚上,舊大街內泊滿名牌房車,車內人一二三就衝入上海天龍樓。原來這裏的師傅大多做了三十多年,在這裏開業後,不少老顧客都是專誠到來,歎碟正宗上海炒麵。

回鍋肉炒麵$40
這類小菜加上海炒麵就最受歡迎,因為有小菜風味,又食到正宗拉麵,一舉兩得,不少食客都是老遠跑來幫襯。






店名:上海天龍樓
地址:香港仔舊大街58-62號地下C舖
電話:28731412
營業時間:11:00am-11:00pm

裕記雜貨店 日日排長龍
香港仔舊大街除了食肆排隊外,就要數這間食品批發公司最吸引,裕記已有分店二十多間,遍布港九新界,香港第19分店由朝到晚都好多人,個個都為買平價貨而來。當小記想入內湊熱鬧時,門口卻擠得水泄不通,大概小記與平價貨無緣!

廟多才是最吸引人
以往香港仔是一個漁港,居住了不少水上人,他們都信奉不同的神佛,故香港仔布滿不少小型土地廟。以前,香港仔舊大街是這裏的市中心,情況猶如現在的香港仔廣場般,人來人往,不少土地廟也建在這條街,逢初一十五都多人到好似黃大仙廟般。加上,謝記的山窿魚蛋麵日日排長龍,使這條原來已不闊落的街道更水泄不通。