食，要有口感外，還講感情，除對食物外，老闆與食客的關係不少得！可能你正奇怪小記何以這麼感性，只不過是今次採訪香港仔舊大街數間麵店後，得到的總結。數間不同特色的麵店，客人對這裏都有深厚感情，味道固然是留客之道，老闆的親切、關懷態度，都是這條昔日大街到現在還人頭湧湧的原因！
記者：梁佩芬
攝影：關文慧
50年前，香港仔舊大街旁的一個山窿內，有位謝先生做魚蛋麵，魚蛋鮮味可口又彈牙，做到街知巷聞；35年前，從山窿搬到地面舖，貫徹始終，依然用新鮮魚做魚蛋，再加入鹽水等攪勻，令魚蛋爽口、結實又有彈性。現在謝老先生已80多歲，店舖由兒媳打理，但味道依舊無改變，令麵舖一年四季、由朝到晚都人潮如鯽，山窿檔做到有限公司，當真少見。
30年老顧客莊太
食咗三十多年，同謝家親切熟絡，就算搬離香港仔，都成日返嚟食番碗魚蛋麵；今日帶位加拿大返港老朋友嚟撐枱腳。
小記一向食魚蛋麵都會加胡椒粉，因要避魚腥味，今次無添加，魚蛋果真有魚味又唔腥，加上湯底好味，想不到區區五粒魚蛋加兩塊魚片，就是50年生意的靈魂！
謝記另一個賣點就是整條金黃色的炸魚片，食客除order魚蛋麵，大多會再要多條炸魚片，切片品嘗，香脆夠魚鮮味！
店名：山窿謝記魚蛋有限公司
地址：香港仔舊大街80-82號地下
電話：25523809
營業時間：10:00am-6:00pm
日式拉麵以北海道最正宗，因為當地特別寒冷，最正是食碗暖笠笠的拉麵；夏季翳悶潮濕，濕濕哋易入口，所以北海道人最叻做拉麵。這些故事，小記都是從拉麵店老闆Anthony處得知，估不到投身飲食業短短四年，就深明這道理，所有拉麵都由北海道運來，當然他亦少不免到當地考察，領略神髓，先做得似模似樣！
無味精、正宗日式豬骨湯底，逢星期二晚上六至十時，全店拉麵買一送一，二十蚊就有咁大碗地道北海道拉麵，咁抵邊度搵！
店名：味吉陽一日式拉麵
地址：香港仔舊大街118-120號兆羣大廈6號舖地下
電話：25559949
營業時間：11:30am-10:00pm
縱橫飲食業二十八年的鍾先生，做勻中西意法日越菜，大約三年前到台南高級食府「台南擔仔麵」偷師，學會如何炮製風行全台的擔仔麵，後改良迎合港人口味，將原先無味的湯底做成豬骨雞肉湯，絕不含味精。
老闆鍾先生
香港仔多水上人，佢哋對食要求好高，係指味道、口感同服務態度，價錢反而唔重要，開舖頭一年最難捱，要不斷轉食物，迎合當地人口味；做落後，發現佢哋係一批好重舊情嘅人，講真有近八成都係熟客仔。
食客葉先生住上水
第一次嚟食，都唔知食乜好，但老闆夥計好有心機慢慢介紹招牌美食，態度非常好。
台灣人做麵唔講究湯底，加上擔仔麵又無味，豬肉碎就成為最有味道食物，有些微蒜茸味，所以食前一定要攪勻肉碎，令湯同麵都加添肉味，更加可口。擔仔麵是台南獨特麵種，入口有點似日本拉麵，不黐牙但帶點煙韌。
蒲理香菇牛筋$28(上)
鹿港同蒲理都位於台南，分別是出產魯肉（即五花腩）及香菇主要市場，魯肉半肥瘦，在一片瘦身浪潮下，依然是最多人order的小食；香菇就打正健康美食口號，加上爽滑牛筋，最正係撈飯食。
店名：台南擔仔麵
地址：香港仔舊大街58-62號協勝大廈地下A及B舖
電話：25183596
營業時間：11:00am-11:00pm
晚上，舊大街內泊滿名牌房車，車內人一二三就衝入上海天龍樓。原來這裏的師傅大多做了三十多年，在這裏開業後，不少老顧客都是專誠到來，歎碟正宗上海炒麵。
這類小菜加上海炒麵就最受歡迎，因為有小菜風味，又食到正宗拉麵，一舉兩得，不少食客都是老遠跑來幫襯。
店名：上海天龍樓
地址：香港仔舊大街58-62號地下C舖
電話：28731412
營業時間：11:00am-11:00pm
香港仔舊大街除了食肆排隊外，就要數這間食品批發公司最吸引，裕記已有分店二十多間，遍布港九新界，香港第19分店由朝到晚都好多人，個個都為買平價貨而來。當小記想入內湊熱鬧時，門口卻擠得水泄不通，大概小記與平價貨無緣！
以往香港仔是一個漁港，居住了不少水上人，他們都信奉不同的神佛，故香港仔布滿不少小型土地廟。以前，香港仔舊大街是這裏的市中心，情況猶如現在的香港仔廣場般，人來人往，不少土地廟也建在這條街，逢初一十五都多人到好似黃大仙廟般。加上，謝記的山窿魚蛋麵日日排長龍，使這條原來已不闊落的街道更水泄不通。