Nokia今年攻勢一浪接一浪，繼5510後又有另一部主打年輕人市場的3350上場。以往Nokia3系機種玩味無窮，今勻這部3350更加再接再厲，遊戲加碼至6個之餘更主張SMS個人化，圖像鈴聲完全由自己話事。而Nokia官方曾聲稱3350只供大陸市場售賣，所以呢批大陸水貨3350分分鐘成為水貨黨的獨市生意。
記者：劉耀祥 攝影：陳智良
上一代3330只有一個新遊戲，大家可能唔滿足，所以今次3350一口氣增加三款新遊戲畀大家。最得意當然就係「Dance2Music」，玩法同大家玩開的跳舞機差不多，跟住螢幕顯示㩒掣考反應。其次就係考你耐性的五子棋，而且電腦都唔弱，行錯步都會輸。最後一個新遊戲就係類似六合彩的幸運號碼抽獎，不過就唔係同電腦玩，只係畀一班朋友估吓開彩號碼。另外，三個舊有遊戲就係貪食蛇2、星空大戰、波子機，「遊戲王」稱號果然當之無愧！
3350在SMS功能上作出大幅改良，首創接收短訊都可設定響鈴，預設鈴聲或自編鈴聲都得，唔似以前獨沽一味玩單音咁悶。
另外，3350增加訊息字數及能夠將所寫訊息複製至備忘錄，毋須再打多次，對於鍾意長篇大論的朋友就絕對適合。而3350亦新增了多重傳送(MultipleSMSSending)，可以將同一Message傳送至電話簿中不同的電話，比以往只限於傳送至Group更加方便，而舊有的SMS聊天室當然無減少。
3350多項新增功能皆強調手機個人化，等你可以創造極具個人風格的手機。所以3350另一主打強項就係內置圖片編輯器，可以隨你心意自製個人圖像訊息，再經SMS送畀你嘅至愛。不過畫圖像記得要有耐性，皆因在手機中畫，畫面細之餘，操控都要有番咁上下技術，要畫得靚都唔係咁簡單。