【本報訊】無綫安排非特技人出身的張柏芝表演飛車特技，引來非議，質疑無綫此舉罔顧藝人安全。
無綫監製衛世輝表示，無綫除為張柏芝及工作人員購買了二億元保險外，更額外為柏芝多購買一百萬元保險，柏芝所有醫藥費和住院費，無綫全權負責。
而無綫製作部助理總監何麗全，昨日亦就今次意外，向柏芝經理人向華強太太陳嵐道歉，承認今次是無綫經驗不足所致，但陳嵐昨日卻說：「做善事唔使做咁危險動作啫，我諗住主辦單位會做足安全措施，𠵱家道歉都冇用，我只希望柏芝唔好有後遺症。」
向華強則表示一定會追究，他昨日到醫院探望張柏芝時說：「我睇完X光片之後好激氣，如果柏芝唔好彩癱咗就慘啦！」有關柏芝保險賠償問題，向太陳嵐表示尚未清楚，對於無綫為張柏芝及工作人員購買二億元保險，並聲稱會支付所有醫藥費，向太說：「既然佢哋話有二億保險，我諗都夠畀嘅。」
張柏芝前晚駕駛的跑車，事後被發現穿底漏偈油，特技人出身的王傑，被問到飛車後出現漏偈油情況是否危險時，王傑說：「應該冇危險，反而放紙皮箱危險性較大，雖然咁做可以阻架車嘅前進，但減唔到太多嘅衝撞力，紙皮箱嘅角太硬，角位好易插穿玻璃，常用嘅方法係用網承接架車，司機旁嘅座位同車尾都要放好沙包，以防架車反側同埋車頂落地。」