陳慧琳剛出道時，曾有一位很出名的富豪，通知銀行為Kelly準備一張沒有限額的白金信用卡，希望此舉可以令Kelly答應做他的女友。
Kelly表示並不認識此富豪，更不會接受對方的要求，Kelly說：「我自己都有白金卡啦，對愛情我都幾執着同專一，你睇我喺呢行咁耐，都係得一個男友就知啦。雖然呢行靚仔唔少，我又成日同啲有吸引力嘅男明星合作，但我個人太理性同冷靜，唔會畀機會人哋同我發展感情，短暫愛情就更加敬而遠之。你知啦！同任何男星有過緋聞，以後自己有乜事就會俾傳媒列個緋聞表出嚟。」
去年Kelly與男友曾因聚少離多而和平分手，後來發覺彼此仍很需要對方，終於又走在一起。
Kelly說：「𠵱家我哋平均一個月都係見得幾次，因為我哋兩個各有各忙，但係大家都盡量爭取見面。不過喺除夕嗰晚，男友叫我出席個party，同啲朋友一齊倒數，但我最終都寧願留喺屋企，同鍾珍佢哋傾吓偈，唔想出街同人迫。」
Kelly表示她與男友間已有默契，均視對方為結婚對象，但Kelly坦言自己事業心強，希望在四十歲前才考慮結婚之事。
訪問結束前，筆者好奇地問Kelly生平遇過最大的挫折是甚麼，她埋頭苦思了約兩分鐘，才說道：「最唔開心咪有次喺錄音室錄歌，因隻歌拍子幾難唱，唱咗幾次阿Mark（雷頌德）都唔收貨，重語氣幾重咁問我究竟有冇練習過，當時我覺得好委屈，咪喊咗出嚟！」
如此挫折，簡直讓人既羨又妒，上天的確似乎特別眷顧Kelly。
撰文：陳月媚
攝影：陳志嵐、馬啟然