梁漢文因為在《齊天大聖孫悟空》中飾演唐僧，而被內地一電單車牌子睇中，以六位數字邀他拍廣告，構思是今日唐僧取西經不用行路，改為騎電單車，極盡天馬行空。
張衛健（健仔）、梁漢文（娘炳）、李燦森及Twins等，現正齊集浙江橫店，為劇集《齊天大聖孫悟空》埋尾。梁漢文因為飾演唐三藏而被內地一個綿羊仔電單車牌子睇中，有意以六位數字邀請他拍廣告。
娘炳日前出席《叱咤》頒獎禮後，已飛返橫店續拍《齊》劇。娘炳在長途電話中自爆說：「拍呢個劇對於我打開內地市場好有幫助，𠵱家好多廣告傾緊，其中一個係內地嘅綿羊仔電單車廣告，我好鍾意佢哋嘅構思，話𠵱家唐三藏取西經唔使行路，坐電單車都得，相信接拍嘅機會都好大，我都希望拍得成，到時同劇集一齊出街，效果一定會好理想。」
此外，健仔在劇中與群猴有多場對手戲，昨日記者透過長途電話聯絡健仔，他笑言小馬騮是他的演戲顧問，健仔說：「有時等緊埋位就會同啲馬騮傾下偈，留意吓佢哋啲動靜，馬騮好有人性㗎，平日同馬騮溝通下，對拍戲會有幫助，但有啲馬騮好曳，一埋位就唔聽話。」
採訪：朱芷瑩