豪華的會展大廳內，尊貴的特首董先生，運用字正腔圓的牛津英語，激昂地闡述舊精英如何如何不是，新精英又如何如何巴閉！
一路四處尋找座位，一路愈聽愈覺不是味兒，一路又覺愈聽愈唔明（可能是自己英文差）。更唔明是，全場九成賓客都是講廣東話，一直提倡母語教學的董先生，何解要用英語講這篇咁具重大意義的演詞，令我這個英文差但又極愛香港大學的破產舊生為難？
更加唔明，點解要講衰我嘅大師兄、大師姊？我係好尊重好錫佢哋！點解作為我哋嘅校監，對最近突然中途無咗校長，民調風波令校譽蒙羞一事，又不置一詞？
董特首先生，我深信大師兄、大師姊們（舊精英）位位秉性純良，只不過是走出象牙塔後，被舊政府帶上歪路，請對他們多一些正面鼓勵，少一些負面苛責，他們查實有許多優點未被認同。至於新精英咁巴閉，歸功閣下領導有方，但讚得多，就包袱重，就議決失靈。仗義每多屠狗輩，愚見係公公賣牛雜賣得叻––是精英；婆婆掃街掃得好––亦是精英！
繞場一圈，覓到座位，屁股還未着櫈，多位舊同學一連串的親切貼心語已湧至耳邊。點應付好呢？只好低首微笑講：「幾好！幾好！我幾好！天氣都幾好！」
殊不知！一開腔便出事。豁達的心境原來關不住口臭。惟恐唐突宴會上的佳人貴客，連忙喚侍應進酒，以酒解圍。
有禮的侍應先生說：「請待董生講完話才進酒。」
吓！咁咪有排等！但侍應老哥又教訓得是。在此，不得不講句：「我錯啦！對唔住！下次唔敢啦！」
董生激昂陳詞未了，已有同學提議：「一陣我哋齊齊起身拍掌好唔好？」
提議一出，對立的爭拗反對聲伴着抑揚頓挫的演詞，此起彼落。
（待續）
電郵：
每日連載刊出