近排啲日圓係咁跌，好多PS2遊戲都跟住跌價跌到「把把」聲，好似新出嘅《GTConcept》咁，好多地方就出現水貨平過行貨嘅現象，不過行貨有中文說明書，咁冇理由唔支持啩！
而水貨PS2主機就跌得慘好多，由於好多批發都返到平貨，𠵱家好多地方都賣緊$1,8xx，平行貨成百蚊有多，真係隨時買埋記憶卡都唔使2千蚊，再咁落去行貨都咪話冇影響，唔知行貨會唔會減價應下市呢？
另外，XBOX方面，今個星期靜靜咁出咗隻《SilentHill2》，不過唔知係咪太少貨，竟然炒到上成600蚊！XBOX機價方面（連一Game），就跌到落$3,600左右。
呢排好多人搵嘅PS2遊戲《桃太郎電鐵X》，據聞嚟緊禮拜三、四到會再有貨返，賣價大約400蚊有找。而斷貨多時嘅PS2《Zero零》，今日亦應該再有貨返。
至於PS2今個月尾嘅重頭作《VirtuaFighter4》，行貨方面雖然已經證實會有貨返，但係截至今日為止，都好似冇乜宣傳咁，唔通因為唔夠貨派，所以要咁低調？另外，有傳Namco隻PS2版《鐵拳4》，香港會有大型宣傳活動，大家要密切留意。
上個禮拜寫過GameCube嘅DVD兼容機Q改機，今個星期終於見街喇！𠵱家市價約$3,300左右，連全區碼DVD加美/日版Game兩用，加上唔使好似GameCube咁「拍」開關掣，有興趣不妨去旺角睇睇。
文：打機鐵人