香港人果然識貨，噚日卡佩雅蒂有個簽名會，就吸引到近二百位球迷排隊，向呢位世界二姐攞簽名，由於人數眾多，呢位美國球手好有原則堅持一人只可簽一次，就算球迷一次過帶齊畫冊、T-SHIRT及大型網球攞簽名，最後都只得一個咁大把，難怪有人即場以二百蚊收購。
相比起前兩日，噚晚維園網球場天氣明顯轉凉。天氣對於班球手，當然影響不大，反而場內賣雪糕雪條嘅小販，就傷亡慘重，成晚喺度等運到。之不過啤酒女郎，卻其門如市，原因好簡單，入場觀眾有唔少「鬼佬」，佢哋好似當水咁飲，啤酒唔好賣至出奇。
Yuki同Karina兩位靚女，都係放緊新年假嚟嘉年華會廣場做兼職嘅大專生，工作主要幫一個攤位派朱古力同邀請球迷玩踩單車電子遊戲機，做四日就有一千元人工都唔錯。不過，Karina話最開心嘅，係見到咁多人排隊捧場喎。