趙飛雲背脊敲得響，港股噚日果然以較大成交飆升，74億元升278點。恒指升至11700水平，手上冇貨嘅散戶好多都話唔知點算，你話持貨量偏低嘅基金經理會有幾頭痕？相信只要外圍股市企穩，下個禮拜初段將有更多買盤入市推高恒指。如果係趙飛雲揸旗，老虎都挾穿萬二關，到時要補貨嘅買盤更多，可以慢慢累積夠好倉至掉頭造淡，哈哈哈……。
幻想完做大戶之後，睇番個倉嗰兩隻股，真係覺得有啲悶，行得重慢過烏龜，個市升近300點，佢哋只係微升1仙。趙飛雲唔孭住個倉之前，只要有需要，一日可以七出七入，炒得天昏地暗，但為咗照顧讀者上車落車，將唔會推介炒得太短嘅股票，當啲股未到時候，難免行得慢啲。現時睇緊一隻亦係行得好慢嘅地產股──香港興業（480），公司近期消息較多，但股價變化唔大。睇番基本因素，隻股其實唔差，2002年預測PE就算回升至7.5倍，仍屬偏低，加上派息率亦幾好，適合揸中長線。
下個禮拜最緊要睇住港股成交變化，無論個市點升都好，若見成交顯著回落，就要打醒精神。