恒指彈升278點，個別窩輪飛沙走石，龍虎榜上有兩隻輪升幅超過1倍。
滙豐認購輪1704，由6仙飛上15.4仙，升幅157%。呢隻輪，近期輸死唔少人，昨日例外。大約剩番兩個半禮拜交易，正股（005）現價94.75元，升唔上窩輪行使價98元，隻輪就係咁先。正股升上99.5/100元，隻輪值番𠵱家個價。
亞鋁公司輪656，由2.3仙彈上4.7仙，升幅104%，30萬份易手，就撈咗個龍虎榜阿2個席位。正股（930）由50仙升上52仙，帶起656，不過都係格硬嚟。656剩番兩個半月壽命，行使價69仙，正股距離行使價好遠，買隻輪唔化算。若然博正股踢上抽水，直接揸正股實際得多。
升幅排第3嘅係滙豐認購輪1735，由12.1仙升上16.7仙，進帳38%，多得滙豐上升2.75元帶動。
1735下月中夠鐘，行使價102.11元。正股下個月中前唔見呢個價，隻輪冇晒價值。食得鹹魚抵得渴，想贏大錢，最好有輸清嘅心理準備。