各大手機廠實牙實齒話推出的手表電話，計有Motorola、SAMSUNG和SIEMENS。不過講就天下無敵，真正派街的，Sorry，一隻都無。今日我哋攞到呢隻西門子手表電話，2002年派街機會甚高，而且已經密謀加入藍芽，重喺表帶上大玩Fashion，有咁彩玩到咁彩。為乜啫？出位囉！
文：King哥
呢隻西門子手表手機，又稱手表電話，講到明行勻GSM900/1800/1900三頻，即係漫遊到美加GSM網絡都唔使換機。而且重將成部手機縮小入一隻手表內，淨重36克。
不過西門子似乎還有不滿，已改良的第二代手表電話變得更流線型，更可以拆出掛上勁鏈戴出街。不過到底是邊款率先推出市面，暫時不得而知。
手表電話的最大賣點，是成個通訊模組可以從表帶上拆出。猶如一隻無天線手機的迷你版，鑲嵌入表帶內。表面上設有打出和收線按鍵，而直接進入電話簿和菜單Menu的兩個操控鍵就設在表的左側，右側是上下操控的選擇鍵。另外，手表可放在與電腦連接的Cradle上，在電腦內輸入資料與手表作同步互傳。
手表電話既有機套連頸繩可作掛頸裝飾用，另外表帶亦有分粗、中、幼三款設計，厚、薄、顏色、花紋、扣鈕等等多種配搭。不過，由於手表電話尚未大量生產應市，多項功能尚未定案，臨門一腳都可能作出更改，各位Fans不妨耐心等待。
手表電話以人手選擇人名菜單，然後㩒手表上下箭嘴按鍵，在LCD數字顯示上移動作選擇，稍作停留，便會自動撥接。
耳筒就插在手表的右下方，打出時就要靠它作對講。不過，西門子亦將藍芽耳筒用在手表電話上，只要將接收器套在表帶上，即可作無線聯繫，而藍芽耳筒的外殼顏色就有淺綠色、炭灰色及藍色。