一個破產大學生吃了一頓尊貴豪華的精英夜宴有感……
二○○一年十二月十日，電話筒傳來高官鄭的親切聲！
「阿濤！港大九十周年晚宴預你一張飛，千萬不要匿埋唔見舊同學，速速報名好唔好？」
我無奈地回應：
「鄭高官，我從沒有匿埋過，只是甚少同學主動搵我，難道真的是街頭販賣生涯中了大隱隱於市的古語？認真要求，在破產前後，你老哥已仗義幫了細佬一大把，今次六百元的入場費，請准我自掏腰包。」
雪中送炭，暖意填胸，但細數頭寸，又頓覺淒涼惆悵。點都好，「一水護田將綠繞，兩山排闥送青來」，高義隆情之炭，斷不會妄作自毀之用，面對現實，移寬就緊，子女聖誕及新年的節目，大不了將就將就。
二○○一年十二月十八日下午六時，我焦急地說：「司機哥哥，喺荃灣兜咗成個鐘都搵唔到大窩口，點搞呢？不如放低本地圖，聽我講，等我帶路好唔好？」
六時十分，飛奔將五箱童書跑上八層高而無𨋢的幼兒院完成送貨。
七時三十分，來不及清洗掌上的黑指甲，急忙披上一件夏天西裝，遮蓋了穿了洞的藍色茄士咩毛衣，再着上百多元的全新皮鞋，衝到門前，弊！無呔！點算！鬼靈精的九歲大仔左手呈上自己的校呔說：
「爹哋！醒你！」
八時十分，得新入行的司機哥哥義載，終於抵達夜宴會場。當時，賓客已入席，一枱一枱的社會賢達，一位一位的新舊港大精英，正在靜靜地聆聽尊貴的特區首長──董先生在講解新舊精英之分野……咁！作為一個生意失敗，個人又破產的港大舊生，閒時，只識廁所寫大字，行街唱歌（《洪湖水浪打浪》我識，《Bridgeovertroublewater》我又識，《LondonBridgeisfallingdown》就更加識），咁又算唔算是精英？……下文待續。
備註：
一、街頭無牌販賣《哈利波特》的生涯會因此專欄的開闢而結束，家庭生計的困頓亦隨稿費的上期預支而得紓緩。一直以為，只有舞女賣肉才可預支上期，殊不知在報章販文，亦可預支上期，真得意！會不會是因為賣肉與販文屬同一門子的勾當？
二、夜宴當晚，時不時目光停留多了一些在「眾位」美貌猶勝昔日的舊同學臉上，在此講聲恕怪小弟無禮，因為在一貧如洗後，生活的樂趣每多來自以閒情欣賞身邊的美麗自然景物，「長門終日無梳洗，惟有珍珠慰寂寥」，有怪莫怪，原諒小弟多開眼界。
三、破產署諸君若見此欄，望勿擾勿盼，販文的收入，一定會依時報上。去年審計署評貴署欠缺效率，由今日到明日，請多加努力，莫再浪費時間於本人身上。要知道，庸人頂多自擾自身；而庸官則每每自擾擾民。祝萬事勝意！
文：陳興濤