視高薪挖角搵咗陳寶華做戲劇總監，最近佢就準備喺呢個月開一套二十集嘅古裝劇，題材係描述中國唐朝大詩人李商隱。
馮仁昭收到風，陳寶華原想搵因主持《百萬富翁》而人氣急升嘅陳啟泰扮李商隱，但結果搵咗陳錦鴻代替。陳啟泰噚日就話：「之前我聽過公司話有呢個劇，但重未落實係唔係搵我，當時我重忙緊主持《百萬富翁》，兩項工作相叠會應接不暇。而且自問個樣唔適合拍古裝，我唔戴眼鏡好樣衰。」
至於陳錦鴻噚日喺電話度話：「我𠵱家淨係睇咗兩集劇本，公司通知要下個禮拜先試造型，好多詳情重未知。」問陳錦鴻知唔知呢個角色原屬意陳啟泰，佢只係執二攤，陳錦鴻話：「冇所謂，有啲嘢講乜都得，簽咗約先算落實，我覺得就算搵陳啟泰做都可以試吓。」
王晶同文雋搞嘅電影《當男人變成女人》，係為吳志雄籌錢還債。原本佢哋想叫啲藝人幫手唔收錢拍呢套戲，但志雄哥就覺得咁樣唔係幾好，錢要畀，不過畀少啲啫。好似古天樂、舒淇同楊恭如只係開一日工，所以畀封利是，而其他佔戲較多嘅主角好似鄭伊健、王敏德、張達明同埋黃卓玲收嘅片酬都低至三、四折，大家咁做都係為咗幫志雄哥，證明娛樂圈其實都好有人情味。
姚嘉妮噚日去旺角釣蝦場為新戲《狂野臥底》出席開鏡儀式，佢喺片中做一個記者，為追查殺手混入黑社會而結識鍾兆康，而且重會挑逗佢。問到姚嘉妮挑逗鍾兆康嘅戲分會唔會好大膽，佢話：「冇乜嘢㗎，我只係用眼神電佢已經令到佢發晒癲，佢喺戲度係個比較天真嘅蠱惑仔。」
周星馳部《少林足球》喺香港有幾勁就係人都知，但估唔到星爺勁到將呢部戲帶埋去荷李活。馮仁昭聽聞《少林足球》今年四月就會正式喺美國上映，至於部戲會唔會搵人配音，就好似重拉鋸緊，星爺就梗係希望可以原裝版本上映，好似《臥虎藏龍》一樣咁威，而《少》片亦會於五月喺日本同韓國上映。
廖碧兒噚日喺電視城參加「一月星辰」活動，廖碧兒話今年會喺香港過生日，問到佢緋聞男友劉愷威會唔會同佢慶祝，廖碧兒話：「我諗唔會，佢都唔知我幾時生日，我重計劃咗今年生日同爸爸食飯慶祝。」
王家衞每次見記者嘅造型都係戴黑超或者粗框眼鏡，但呢排佢喺上海拍《天下無雙》，罕有地畀現場記者見到佢唔戴眼鏡個樣。事緣佢同個工作人員食飯，唔覺意除咗副眼鏡，不過馮仁昭就覺得，佢個樣都係戴咗眼鏡有神秘感啲。
有報道話亞視有員工背唔到「員工八條」而被口頭警告，封小平噚日喺亞視對此回應話：「每間公司有每間公司嘅文化，呢八條只不過係將公司嘅利弊歸納一齊。」而新遊戲節目《各出其謀》被英國方面投訴，封小平就話：「呢啲係好事！我哋覺得有爆煲顯示會好睇啲，𠵱家都重做緊調查，到時我哋會以數據去支持咁做。」