昨日有消息話中國十年內都不會將人民幣自由兌換，若果傳聞屬實，呢個消息對香港肯定係一大喜訊，因為只要人民幣一日不自由兌換，中國只能當低成本中心而唔能夠做盈利中心，而香港作為外商投資中國嘅橋樑地位就可穩如泰山。單係呢個消息就應可以刺激港股勁升，恒指一年內重上14000又有何難呢？
一直以來，外商投資於中國，利潤皆唔容易滙出國外，因此外商投資中國嘅模式，一直視中國為低成本生產中心，然後將產品高價出口至其他國家獲利，而香港就從中抽水，一旦人民幣能自由兌換，亦即係話投資中國可以唔經香港。
《遠評》報道刊出後，對歐亞農業（932）殺傷力有限，歐亞反彈逾8%。公司主席今日會來港解畫，相信可能重有得彈。
貨源歸邊嘅白馬戶外媒體（100）亦寂寞難奈，單日急升12.3%，重上水面，收6.40元，成交增至1.16億元，睇勢唔見7元唔會罷休，但奇怪嘅係噚日未見高盛大手掃貨，唔通有人使橫手？
艾克國際（8179）近期乾升至0.62元，噚日終於力有不逮，大瀉21%。Cookie話有人開始散貨，不過只係試吓承接力夠唔夠，後市可能重會炒高啲至真正散貨。此股由去年11月0.26元開始炒上，至今升幅達1.38倍，相信有貨都賺夠皮，就算掟低至0.30元都執唔少。
新世界（017）成交增加，但股價只微升1.5%，據聞公司可能短期內又有減債動作，股價有機重上7元。