油組成員國同意減產，紐約期油每桶漲價1.05美元，油股有反應。中石油（857）升4仙，中海油（883）漲15仙。中石油有隻認購輪1732，對正股上升有啲反應，由2仙升上2.2仙，升幅1成。4月夠鐘，行使價1.865元，正股𠵱家至係1.43元，冇乜機會升到窩輪行使價，1732遲早冇晒價值，咪貪細細粒容易食，提防容易直。
3隻中海油認購輪1764、1759同1762，升幅7.4%至11.3%。若然要揀油輪，最實際對象係1764，現價8.9仙，下月初夠鐘，平水，槓桿率8.4倍，缺點係交投唔多。
滙豐（005）是日跑贏大市，有1.25元進帳，冇人理啲不利新聞。
之但係，兩隻成交活躍嘅滙豐窩輪，即認沽輪1739同認購輪1704，同一命運，齊齊急跌，分別唔見18%同24%。
1739跌，可以理解，因為正股升。1704跌，則係因為愈嚟愈近埋單日期，溢價冇法子唔愈嚟愈細，昨日溢價7.2%（槓桿率153倍），都重係唔值得博。