經紀陳噚日同小初講，陽光文化網絡（307）近幾日成交非常之大，但股價於過年前一日彈上11仙水平後，最近兩日都喺11.1仙附近爭持，情況幾特別。
陽光噚日微跌唔夠1%，收11.1仙，但成交股數就有成1.06億股咁多。
經紀陳話，隻股上個月批過一批總數逾6億股嘅新股，之後股價就由12仙左右跌落10仙。照計新股尚未出籠，冇理由會有咁多貨沽。
小初覺得經紀陳睇漏一點，就係陽光除咗現任大股東外，以往一名主要股東仍然持有唔少貨，所以股價一踢高，人哋就係咁沽。
睇番盤路，今次嘅新炒家完全係有備而來，連續接足兩日貨，擺出想睇吓你沽得幾耐咁款，如果跟住幾日，炒家仍然夠財力同埋膽量接晒所有嘅貨，睇怕陽光今次都應該有得炒。
小初諗住睇多一陣好淡大鬥法，先至決定上唔上車。