香港雜誌真係愈做愈平，兩本以女性讀者為主嘅周刊《忽然1周》同《飲食男女》，會喺今日合併，合併嘅意思就係兩本書夾埋一齊賣，今日讀者可以用一本書嘅錢買齊兩本，咁重唔止，兩本書原本各賣八蚊同十蚊，𠵱家就只係夾埋賣八蚊。負責睇晒壹傳媒旗下雜誌嘅執行總監黃偉民同八方講，合併之餘重減價，係唔想用開八蚊買《忽周》嘅讀者有損失喎，佢重誓言藉此爭取成為全港最高銷量雜誌，攞到更多廣告，佢重好豪氣咁講：「媒介遊戲係贏就決定一切。」佢又話首次出版會印十七萬本，長遠希望賣到二十萬本。
不過有雜誌就搶先一步減價應戰，楊受成名下嘅《東方新地》噚日出版嘅一期，已由十二元減到十元，至於減價原因，佢哋就唔肯講嘞。
E-mail：