好多人都識得創作歌手盧冠廷嘅音樂、作曲才華，但係唔講你唔知，佢簽合約寫自己個名寫極都會寫錯，Lowell會變成Loweel，永遠作唔到一篇完整嘅文章，讀英文字母L同N字都分唔開，因乜事咁論盡呢？佢噚日喺香港醫學會嘅「杏林歌韻助深聲」音樂會籌款記者會同八方講，佢由細到大都係咁，阿婆重以為佢冇心機讀書，成日打到佢飛起，讀書生涯好鬼慘！
其實佢相信自己有齊五種特殊學習障礙，包括閱讀、視覺空間感、發展協調、語言及數學運算等障礙。醫學界估計香港好似盧冠廷咁嘅細路有幾萬個，盧盧希望大家關心佢哋嘅學習問題。個音樂會係為咗呢類細路仔籌款，畀由家長組成嘅特殊學習障礙協會多啲資源開輔導班，有興趣買票或查詢，可以打醫學會秘書處電話：25278941
（圖）盧冠廷（左）有特殊學習障礙，讀書唔叻，但音樂天分就好好。
E-mail：