大除夕夜扭開電視，公仔箱內人影憧憧。睇真一下，在鏡頭前跳舞的是盧海鵬，唱廣東話《夜來香》的是李隆基。無綫主持的除夕倒數歌舞夜真的敬老，讓人感動。
這個「長者嘉年華」，沒有選擇在年齡超過二十二歲已經被噓、貶作老餅的時代廣場做countdown。也沒有到人鬼不分、一夜情基地的蘭桂坊做live。畢竟盧海鵬不是滑板仔偶像，無論幾努力穿上陳冠希的招牌賴屎褲上陣，也不適宜在羅素街的人造雪景中紮紮跳。李隆基雖然歌喉唔曳，但出入蘭桂坊經常走光穿崩的性感竹升妹會覺得李隆基很深圳，跟Soho一帶的鬼佬酒吧唔襯。
荃灣的歌迷也許還比較長情，草根地區的觀眾，現實點講，是冇咁扮嘢。如果記者問2002新年願望，荃灣街坊大概不會像蘭桂坊那位哥哥，回應說：「人人開開心心，世界和平，布殊早早落台！」拖着老婆仔女的阿叔會咧開嘴笑着說：「人人有工開咯，仔女聽教聽話咯，盡快獲配公屋咯；係嘩，生活得好啲咯。」記者為了配合直播，拖長時間再問落去：「咁，重有呢？」阿叔摸了酒糟鼻哥一下，答：「董特首都唔係差成咁，冇功都有勞喎，佢同聲同氣，唔係紅鬚綠眼，大家唔電（掂）傾到電（掂）。」記者收貨，倒數進入最後一秒。2002年個頭，開得夠晒……大。
除夕夜我從大吃大喝平價餐、家爺仔乸同枱但煙照煲、粗口照講的兇猛旺角，坐地鐵過海。中區警力鼎盛，差哥差姐是夜特別有型。
香港是有料到的大觀園，劉姥姥過足癮。除夕晚汪阿姐的珠片裙，閃靚過澳洲悉尼港的煙花。