康華前晚同一男一女朋友，去咗跑馬地滿屋點心食消夜，由於近排天氣亁燥，所以佢哋話要食糖水滋潤吓。康華同馮仁昭講，佢噚日去澳門做一個私人派對嘅嘉賓，酬勞有五位數字。
趙薇日前喺湖南出席一個電視台活動時，慘被人潑屎，康華去澳門做騷，問佢會唔會擔心人身安全，康華話：「我唔知趙薇單新聞，我呢幾日冇睇報紙，我去澳門做騷，安全問題應該唔緊要，因為有猛男陪我去。」猛男？到底係邊個？康華話：「佢咪我阿哥囉！之前我試過去嗰邊做騷，返到酒店，有人上嚟拍門叫我落的士高玩，佢哋話有班人等緊我，最後我都冇去。」
零一年埋單嘞，香港電台第一台有個叫做《奇情一週》嘅節目，就搞咗個「奇情新聞大賞」。當中有個大賞叫「奇情女士」，馮仁昭知道白姐姐憑住上年入獄事件，以大比數拋離對手，喺8126張票數中，佢就佔咗43%，攞第一位，葉劉淑儀同陳方安生都敗喺佢手上，攞第二同第三。不過白姐姐話，呢啲獎，真係唔恨要！
前《睇真D》主持盧希萊生咗個女之後，成個人都開心咗好多，馮仁昭同佢通過電話，佢話老公豹哥做咗老竇之後，成熟穩重咗，雖然唔識湊女，但成日都喺個女隔籬睇吓有乜幫到手。兩公婆重諗住短期內搞吓生意，因為呢個時勢搵工做都唔容易，就算搵到，收入都好難理想。
樂壇頒獎禮又係時候舉行，各大小歌手都空群而出，有啲唱片公司為咗同旗下歌手造勢，特登call齊fans吶喊助威，馮仁昭知道有啲臨時fans，每位收一百二十蚊，所以唱片公司搵三兩百個fans助陣，一次都要使成幾萬銀，都咪話唔揦脷。
新力唱片嘅歌手前晚未能喺新城頒獎禮奪大獎，得歌曲獎嘅彭羚未有出席慶功，而台灣組合F4嘅獎項更留低咗喺慶功宴上，新力總經理王凱文噚日話並冇質疑賽果，彭羚只係習慣性唔出席慶功，而F4嘅獎項只係忙亂間遺留，佢哋事後亦緊張咁四處搵。
葉德嫻今年會重出江湖，佢喺三月開完演唱會之後，環球會乘勢同佢出碟。其實葉德嫻已經有好多年冇出過唱片，但佢喺年多前同許志安合唱嘅《教我如何不愛他》，反應都唔錯，所以葉德嫻對呢次出碟都好有期望，重專登搵埋倫永亮做監製㖭。